OKONGO – Uunamapya owo ehukamugongo lyoshilongo, mboka tau vulu okutaandeleka eliko lyoshimaliwa moshilongo nokukandula po ondjala noluhepo.
N d h o k a o d h a p o p i w a komupevipresidente Netumbo Nandi- Ndaitwah, koshituthi shOmaludi kOkongo koshitopolwa shaHangwena.
Onda mono aanyasha oyendji taya kutha ombinga moshimpungu shuunamapya shoka tashi hokitha notashi ulike euveko lyaanyasha mpoka lyi thike nena.
“Ohandi kala ndi uvite ohokwe sho aanyasha taya kutha ombinga miimpungu yuunamapya oshoka nale oshimpungu shuunamapya osha li sha talika ko shaantu mboka yaa uvite ko,” ta tanga ngaaka.
Nandi-Ndaitwah ta ti, oshimpungu shoka okwa li sha talika ko shoongaga, ihe osho shi na oshilonga shivulithe iimpungulonga oyindji.
Ta gwedha po ta ti, ngele oshilongo tashi longo neitulemo oshowo nuudhiginini, monakuyiwa otashi ka landitha wo iikulya kiilongo yokondje, nopamukalo ngoka eliko moshilongo otali indjipala
“Out na omahala ogendji nagamwe opo taga tungwa, taga monika nawa pakutala ihe itaga landitha iikulya tayi ndulukwa moshilongo, shoka hasho ehumokomeho,’’ ta nyenyeta ngaaka.
Ta gwedha po ta ti, ehumokomeho ongele iikulya tayi longwa moshilongo.
Nandi-Ndaitwah okwa popi ta ti, oshilongo shoka itaashi vulu okwiipalutha sho shene, nena itashi vulu okwiithikamena po kusho shene.
“Onkene oshilongo oshi na okulonga nuudhiginini, opo kaashi ka indile puushiinda. Otandi kumagidha aanafaalama ya longe nuudhiginini okuyambula po eliko lyoshilongo oshowo okukandula po ondjala moshilongo,
“Itatu vulu okupopya ekandulepo lyondjala, inaatu tumbula nkene tu na okulonga opo ku kandulwe po uupyakadhi mboka hau eta ondjala, oshoka ohau kandulwa po uuna wa tulwa miilonga,” ta kumagidha ngaaka.
Omupevipresidente ta kumagidha kutya aanyasha itaya vulu okukala yaa na iilonga, omanga ye na ompito yokwiilongela yo yene.
Nandi-Ndaitwah okwa popi kutya ngele aanyasha oya kutha ko oongaku e taya itula mo muunamapya, oyendji otaya ka hulitha po enyenyeto lyokwaa na iilonga,” ta popi ngaaka.
“Otwa pumbwa okukala tatu dhiladhila tatu endelele, okuya po noompito oshowo oondunge ndhoka tadhi tu tungu okuhuma komeho, osho wo opo tu vule okukandula po ondjala moshilongo,’’ ta ti ngaaka.
Ta gwedha po kutya uunamapya ohau pula oondunge, omadhiladhilo, oonkondo oshowo eitulemo,’’ ta popi ngaaka.
Omukalelipo gwombaanga yoAgribank, poshituthi shoka okwa ti, ohaya yambidhidha aanafaalama nomikuli, nonkene okwa hiya ayehe ya ninge omayindilo oshowo ya konge uuyelele nkene ye na okuyambidhidhwa.
“Ndjika ompito ombwaanawa oku mu tseyithila nkene mu na okuhumitha komeho oongeshefa dheni. Kape na we oondjindikila, shoka sha pumbiwa uuyelele ashike,’’ ta popi ngaaka.
Omunafaalama gwiikwamboga Soini Ndikwetepo okwa ti, ongeshefa ye otayi ende yuuka pevi oshoka kape na omayambidhidho ga gwedhwa po uuna ta ndopa.
“Onda kondj i t ha et h i mb o okukonga omayambidhidho okuza mpeya naampeyaka ihe inandi mona eyambidhidho, oombaanga nuuministeli otau pula iinima kaatu yi na,’’ ta nyenyeta ngaaka.
Ta gwedha po kutya ngeno okwa li epangelo tali yambidhidha aanafalama unene yiikwamboga ngeno eliko lyoshilongo olindji itali piti mo.
-vkaapanda@nepc.com.na