OMUTHIYA – Emmanuel Enkara, oshilyo shelelowiliki lyoNational Arts Council of Namibia (NACN) okwa kumagidha aantu mboka haya zi kiitopolwa yokuushayi ya kuthe ombinga moshimpungu shuunkulungu opo ya nane aapashiyoni. NACN ehangano ndyoka lya kwatela komeho oshimpungu shuunkulungu moshilongo.
Enkara ndhika okwa li e dhi thamuna mEtitatu mOmuthiya pethimbo ta hwahwameke ekuthombingna moshimpungu shuunkulungu, nokwa ti iitopolwa yokomikunda nayo otayi vulu okuhila aapashiyoni tashi pitile muunkulungu.
“Otwa hala aantu yomondoolopa muka ya mone oompito moshimpungu shuunkulungu oshoka otwa itaala kutya uunkulungu ohawu hili aapashiyoni mboka taya kokitha eliko lyondoolopa,” ta ti ngaaka. Enkara okwa li wo a gandja omayele kaanambelewa yomoshimpungu moka opo ya ye moshigwana yo y a ape okunikathana komilungu melaka ndyoka hali popiwa momudhingoloko moka opo ya uve ko oompito ndhoka tadhi vulu okweetwa po kuunkulungu. “Naya ye moshigwana, ee taya tseyitha oompito ndhoka NACN e na po, okuzilila momakwatho ngaashi goshimaliwa ya vule oku ka tsikila nomailomngo gawo kiiputudhilo yopombanda,” Enkara ta ti ngaaka.
Gumwe gwomiilyo yokuhwahwameka iilonga yo-NACN, Veronique Kuchekana-Chirau, okwa ti otaya kambadhala okugandja uuyelele woompito dha yooloka dhuunkulungu opo aantu ya kuthe ombinga. “Otwa hala okukwashilipaleka kutya aanuunkulungu miitopolwa yetu ayehe otaya mono oompito dhokuyambidhidhwa,” Kuchekana-Chirau ta ti ngaaka.
Okwa gwadha po wo kutya NANC ongoshiputudhilo shokuyambidhidha aanuunkulungu moshilongo, ihaya mono omayindilo okuza kaanuunkulungu ya za kiitopolwa ayihe. “Ihatu mono omaindilo okuza kaalongwa okuza moondoolopa ndhika mboka ya hala okuyambula po uunkulungu,” ta ti ngaaka, ye ta gwedha po wo kutya NACN okwa hala aantu ya yambule po uunkulungu nokwiimonena uuhupilo okupitila miilonga yawo. Kuchekana-Chirau okwa ti wo aanuunkulungu mboka taya kongo naya vule okukala taya vulu okukutha ombinga ngaashi miinyandwa, oondaanisa, okuhokolola, okuthaneka, iikwamuthigululwakalo, uunamambo nayimwe wo.
-Nampa