Festus Hamalwa
Omukulupe Jason Binius weedula 65 okwa pewa elifutilomo modolongo loN$1 000 konima a holoka momhangu yaShakati Etitatu eshi vati a vaka po oshikombo shomushiinda waye ndele te shi dipaa.
Omhangu oya undulila oshibofa shaye komafiku 15 Maalisa momudo tau ya omanga taku ningwa omakonakono.
Omutamanekwa okwa lombwelwa komupanguli opo a kale e li kokule noshinyongo shoimuna shamushiinda waye, yee ina pitikwa okulonga oshimbuluma shokuvaka oimuna yovanhu.
Binius okwa li a kwatwa po Etivali mekwatafano loumbudi woshikombo shoshididi osho a vaka koshuunda efimbo lokeengulasha pefimbo ovanhu va kofa. Oshiningwa eshi okwa li sha ningwa Omaandaxa komukunda Onegali moshikandjohoololo shaElim, moshitukulwas shMusati. Opolifi oya hokolola tai ti omutamanekwa konima eshi a dipaa oshikombo okwe shi tula mondjato ndele te shi holeke monduda yokutuvikila meumbo laye.
Vati ombelela oya monika eshi opolifi noshoyo ovakwashiwana kwa li tava ningi omapekapeko meumbo laye. Opolifi oya hokolola tai ti omutamanekwa okwe shi ika okukala ta vake po oimuna yovanhu koinyongo ndele te i dipaa nokudingula ombelela.
Eshi a kwatafana naKundana Chief Iipumbu Ndilimani Iipumbu welelo laUkwambi okwa ti oumbudi woimuna tai vakwa po owa londa pombada moshitunda shaUkwambi.
Iipumbu okwa pula eemhangu opo di kale tadi ningi omakonakono omoule kombinga yovanhu tava holoka momhangu moibofa youmbudi yoimuna.
“Elelo laUkwambi otali ka popya neemhangu opo di xulife po okukala tadi yandje eeboolofa diva kovanhu tava vake po oimuna shaashi oibofa imwe youmbudi woimuna ohamu kala mwa kwatelwa elyenge lovanhu vahapu,” Iipumbu ta ti.
Okwa weda po ta ti ovanhu vamwe ohava kala va tumwa opo va ka vake po oimuna yovanhu onghee ihashi kala shi li pauyuuki omunhu umwe oye ashike a kale a kwatwa po omanga vamwe ihava kwatwa po shaashi ihaku ningwa omakonakono e lixwa po.
Okwa kunghilila oshiwana opo shi xulife po okuvaka po oimuna yovanhu opo shi likelele okuninga oihakanwa yokuya meedolongo noshoyo okufutifwa oimaliwa.
– fhamalwa@nepc.com.na