Kansela gwoshikandjohogololo shUuvudhiya Timoteus Shivute okwa pula omahangano ga yolooka opo ga yambidhidhwe okutunga oontopa dhokupitwa pethimbo lyomeya moshikandjohogololo she.
Oshikandjohogololo shUuvudhiya moshitopolwa shaShana, osho shimwe sho mwaambyoka hayi uudha omeya pethimbo lyomvula.
Omahala gamwe ohaga tetwa ko omolwa oondjila oshowo oontopa dhoku pitila dha teka po.
Shivute ta ti, sigo ompaka oya longa uuntopa uli une, wa longwa koshigwana oku pitila maantu oohandimwe, nosho wo komahangano, ihe nando ongaaka onkene tuu ya pumbwa iilongitho nenge iimaliwa opo ya tsikile okukalonga ndhoka dha hupu ko.
Shivute okwa ti, natango ota indile oshigwana oshowo omahangano galwe ga yambindhindhe ombelewa yawo, opo yi vule okulonga omanga uupyakandhi wo meya inawu thika.
“Inatu kala aluhe twa tegelela epangelo lyi kandule po omaupyakandhi getu, oshoka ita li tu gwananitha atuhe moshilongo, nonando ta li kambandhala ngaa mpoka ta li vulu,” ta ti ngaaka.
Shivute ndhika okwe dhi popi pethimbo a li ta tambula ko ooshako 33 dosamende ndhoka dha gandjwa omagano koshitayi shokoGame shombaanga yaNedbank mOmandaaha.
Omukuluntu shitayi gombaanga ndyoka Beata Nuusiku Hilundwa ngoka a gandja oosamande ndhoka pehala lyombaanga okwa ti, okwa li ya yambindhindha oshikandjohogololo shoka omolwa omaupyakandhi haga holoka unene pethimbo lyomvula.
“Ookasitoma ndhetu ondhindji ohandhi zi koshikandjohogololo hoka, no yendji ohaya ye ya taya nyenyeta omeya ga teya po oondjila, shoka sha li sha nengenekitha oomwenyo ndhetu opo tu yambindhindhe ngiika,” ta fatulula ngaaka.
Hilundwa okwa popi wo kutya, ndyoka onkalo yuumwayinathana oshoka ayehe oya pumbwathana opo ya yambindhindhathane.
“Itandi uvaneke kutya shika ota tu kala ta tu shiningi aluhe, ihe, uuna twa toola ota tu tsikile okuyambindhindha,” ta popi ngaaka.
Ta gwedhwa po kutya ongaashi sha shuwika kutya, aanafalama oeyndji oye li moshikandjohogololo shUuvudhiya, naanafalama oyendji ohaya mbaanga no Nedbank.
Kansela goshikandjohogololo shUuvudhiya Timoteus Shivute okwa ti, okwa pandula komayambindhindho ngoka geya kuyele, omanga omvula inaayi thika.
“Etemo ota li kaya miilonga, ngaashingeyi. Oosamenede ndhoka twa yambindhindhwa nandho otandhi ka thitika oshowo okutunga oontopa ndhoku pitwa,” ta popi ngaaka.
– vkaapanda@nepc.com.na