Mukadi kavamugwene epuko mpanguro zonene nkera morwa kudipaga munwendi gomakwedi ntazimwe ogu gadeye mekuma yikando yoyinzi melima 2019. ‘’ Mukarelipo epangero, katente asi mukadi ogu kwadeye munonagara pevhu vagoronga yikando yoyinzi omu gatulirepo mutwe eyi yatwarederere dogoro munonagara ogu akadogoroke.
Yimo ana kuhunga muhahende Claudia Classen. Clasen kagwene mukadi ogu gonomvhura 30 Priscilla Daukeline Stuurman epuko mokudipaga omu yina zere asi age kwakere negano lyokudipaga mumatigona ogu, Stiaan Cidio Stuurman, poopo kakadwirepo egano lyendi kuhamena sihorokwa esi.
Munonagona ogu Stiaan kwadogorokere mosipangero momazuva 24 Sindimba 2019 morwa kwamutoonene omu garemanene momutwe. Mpanguro nampili ngomu kazipilire kugwana vambangi, nye kuna kumoneka asi, Stuurman kapi gahere munona ogonomugamutumbwidilire asi tamudipaga.
Ntani kuna kumoneka asi age kwamuzumbire munona ogu. Mosiruwo somapuragero, kayimonekere asi mo 23 Mangundu 2019 mo Aussenkehr momukunda horowero gwa
//Kharas, Stuurman kwatanterere nombangi asi age gadipaga munona ogu, Stiaan, ntani age kwanyoka kumuzamweka munona ogu gomukeke.
Mbangi zepangero Estina Hanse katanterere mpanguro asi Stuurman kapi gahere munona ogo nampili nakauke ntani age ngamusigi nkenye apa ure wono vili dongandi, ntani age nganyoka kumuzamweka komavere. Simpe age gahuyunga asi munona ogu ngamutoona mekuma unene mutwe gwendi yikando yoyinzi, apa nye gayirugene, age makura tatantereko vamusinda asi nadipaga mukeke.
Ano mokulipopera, Stuurman kuna kupatana asi age kapi gakere negano asi adipage munwendi. Mokukwama mwendi, ehudi eli kwahorokere paapa age kuna kuzamweka munwendi makura tasikama asi ngano akanwe makanya ponze. Mokulikwambera kwendi, age katente asi monzugo kwakere mundema unen.
Ntani poopo posiruwo oso, age kwakere tapundauka morwa kwakorwere marovhu ganwine. Makura nakufa tagwire pevhu omu garemanene.
Mokukwama nye kumugwana epuko, mpanguro yipo kazigusirepo eyi galifutilire akare ponze, age ngesi takara nye momawoko govaporosi kosasiyona zakara morukanda rwaKlein Windhoek. Muhahende Milton Engelbrecht ntani Taodago Gaweseb ngavakagava paveta asi age siruwo musinke ngakara modorongo eyi ngavakayirugana mo 17 Siwogedi.
–mamakali@nepc.com.na