Kansela woshikandjoohololo shaGuinas Elias Marthinu okwa hokolola ta ti oshiwana shovayelele osha taalela eshongo linene eshi tashi dengwa kondjala.
Okwa ti efiku keshe ombelewa yaye oha kukala ku hadi ovanhu tava pula oikulya ashike kansela ke na kutya oha ningi po shike shaashi mombelewa ihamu kala mu na sha oikulya.
“Ovadali nounona vavo ohava kala va ngudumana ve li momwaalu muhapu pombelewa tava kwena ondjala,” Kansela ta ti.
Marthinu okwa lombwela Kundana ta ti omafimbo amwe oha ningi eenghendabala noku landela oshiwana oikulya noshimaliwa tashi di mondjato yaye.
“Moshikandjohoololo shange osho shimwe shi na oshiwana shovayelele shihapu shihe na omapya okulima, onghee naashi osha eta opo va kale tava dengwa kondjala shaashi i hava longo oikulya momapya avo,” Kansela ta ti.
Okwa yelifa ta ti kashipu komunhu ngeenge e na oshikandjohoololo shiha di oshiwana shovayelele shaashi alushe ove hole okukala ashike va kalela ombelewa tava pula oikulya.
“Epangelo ola ninga eenghendabala doku tuma oikulya yoshiwana ashike paife oya pwa po shaashi ovanhu ova ninga vahapu,” Marthinu ta ti.
Marthinu okwa ti otai indile kovanangeshefa noshoyo ovaleli vopapolitika opo ve uye va yambidide ovanhu ve li momhumbwe yoikulya.
Okwa ti ku keshe ou e na e halo lokuyambidida nakwatafane nombelewa yaye ile oshiwana shikwatafane nombelewa yangoloneya.
Okwa weda po yoo vali ta ti moshikandjahoololo shaye omu na ovanhu vehe na oufemba woshilongo eshi shili eshongo linene kuvo.
Okwa ti natango onghee onga ta pula moshiwana opo shi twikile nokuyambidida Lucas Tsamseb a shivika nawa IlI Ivari ou eli tamono oixuna kondjala, yee vati okwa nyika ounghudi konima eshi a monika oudu komaxuli aye.