Ominista yehongo Anna Nghipondaka okwa ti osha fimana ngeenge ovanafikola tava pewa ouyelele kombinga yomaifano oilonga a yooloka oo ha e li hongelwa koipupudilo yopombada moNamibia.
Okwa ti ngeenge omunafikola a kwa pewa ouyelele kombinga yomaifano a yooloka eshi otashi mu kwafekele opo a kale eshi kutya okwa hala oku ke li hongela eifano lili pi.
Nghipondaka edi okwe di popya koshivilo shoipindi noshoyo keyandjo louyelele kombinga yomaifano a yooloka la li kOmuthiya Etitano. Minista okwa yelifa ta ti ovafikola ve li mondodo onhi-9 fiyo 12 ovo unene va pumbwa okukala va pewa ouyelele diva kombinga yomaifano oo va hala oku ke li hongela.
“Otashi kwafele ngeenge okaana ke shi eshi ka hala oku ke li hongela opo ka kale ka ninga omapekapeko kombinga yeifano olo ngeenge oku na tuu eemhito doilonga noshoyo okukala ke shi oilongwa hai ningwa ko,” Nghipondoka ta ti.
Okwa ti ehandjo louyelele lomaifano ota li kwafele ovanafikola opo va kale ve shi kutya omaifano oo va hala oha dulu oku li hongelwa koipupudilo ili pipo noshoyo okukala ve shi oipumbiwa oyo hai pulwa opo omunhu a tambulwe.
“Elalakano lokuyandja ouyelele kovanafikola opo va kale ve shi kutya moNamibia omu na oipupudilo inga pi ya tambulwa ko NQA. Onghee eshi otashi kwafele ovanafikola opo vaha ka fikola koipupudilo oyo ina i tambulwa ko koNQA,” Minista ta ti.
Okwa kunghilila ovahongifikola vo shilongwa shoLife Skills opo va twikile nokukala tava yandje ouyelele kovanafikola una sha nomaifano a yooloka opo ovanafikola va kale ve na eshivo kwa shi va hala okulihongela.