Aanangeshefa yomomapandaanda mOshakati oya popi kutya otaya nana nondatu molwaashoka iilandithomwa yawo ihayi landwa we nookastoma otadhi yambidhidha ashike Aangola.
Aanamibia mboka haya landitha kondje yomatala Omaandaha nEtitano, otaya nyenyeta kutya okapale kawo oku udha ashike Aangola omanga ya thinana mo.
Aakwashigwana oyendji yaAngola mboka haya landitha pokapale mpoka ohaya landitha omaludhi giinima oyindji mwa kwatelwa iikwamboga, omagadhi gokulya, oongaku, iipumbiwa yopelugo ngaashi uuyaha, uusindo uukopi oshowo iikulya ya yooloka kondando yopevi lela.
Omulandithi gwopomatala, gomeni Namutenya Shikulo okwa popi kutya onkalo ndjoka yaAngola ya manguluka otayi uvithanayi, no tayi ya shunitha monima.
“Ookasitoma ndhetu ohandhi huulile ashike kondje , unene momasiku ngoka gaali ya uthwa ya landithe,” ta nyenyeta ngaaka.
Ta ti, momasiku go wala ohaya kala ye li momapandaanda , ya halakana nondoolopa ayihe. “Oshike ngele ose ta tu landitha momapaandanda hatu tidhwa mo, ihe aAngola oya manguluka ashike,” ta pula ngaaka.
Ta ti, elelo lyondoolopa na li ninge po sha mpoka oshoka nayo otaya katameka okukatentena ookasitoma komeho gomatala ngo manene.
“Ohatu kala twa kaalela omatala okuza ongula sigo okomatango tu landithe iinima yetu, ashike ookastoma ihadhi thiki ko we kuse, oshoka odha kondekwa. Ohatu mono ashike aalandi taya yalulwa, shoka ka shili mondjila nando.” a popi ngaaka.
Sonia Shivute okwa ti, ita popile nando aAngola taya dhakula po ookaositoma dhawo, omanga taya lala niilandithomwa yawo inaayi pwa po.
“Ngeno okwa li ose tu li koshilongo shawo, uuwanawa mboka ita tu wuningilwa. Oshike tuna okuyasila ohenda, omanga se ta tu mono iihuna,” ta pula.
Ta ti, oya hala okukala taya landitha ya manguluka onkene, naya ye, ya kalandithe koshilongo shawo.
“Naya shune ya ka landithile koshilongo shawo, otatu nana nondatu, Onkalo oya dhigupalela nale kehe gumwe, ndele natango otayi nayipalekwa ishewe kaantu ya za kiilongo yokondje. Aangola hayo ayeke omuna natango aaZimbambwe nayo taya landitha,” ta gwedha po ngaaka.
Itatu vulu okuhalithila iinima yetu payelekanitho noondando dhawo oshoka oye na ombiliha unene, onkene aluhe otse owala hatu kanitha,” osho Shivute a popi ngaaka.
– vkaapanda@nepc.com.na