Festus Hamalwa
Mayola wodoolopa yaNdangwa Paavo Amwele ota ti ovalandifi vomomapandaanda inava fimaneka omilandu da tulwa po kelelo lodoolopa eshi hava kala tava landifile peenhele odo inadi ufwa okulandifilwa.
Okwa ti muni waNdangwa okwa kala nokupopya noshiwana loikando ihapu opo shi xulife po okulandifila keshe pamwe ashike oshiwana onghee tashi twikile okulandifa.
Okwa ti elalakano okukaleka po odoolopa yaNdangwa i li pamufika muwa ngaashi naanaa eedoolopa dikwao da putuka dihe na ovanhu tava landifile keshe pamwe.
Okwa hokolola ta ti eshi otashi kaleke po yoo vali oukoshoki modoolopa.
Edi Amwele okwe di popya eshi a ninga eenghundafana naKundana eshi a hokolola ta ti okwa didilikwa mOndangwa mwe lihanena ovanhu hava landifile keshe pamwe, oshinima osho sha talika ko kutya osho tashi hapupalifa ekako.
Onghee okwa ti eshi otashi ulike efano lii kovatalelipo shaashi paife modoolopa itamu monika vali nawa.
“Omunhu keshe ou ta ka kala ina hala okuliufa komilandu edi da tulwa ota ka pewa ehandukilo lokufuta oshimaliwa shonhumba ile a nyekwe oihalandifomwa yaye,” Amwele ta ti.
Okwa ti muni okwa ninga eenghendabala dihapu okukala a yandja onhele kovakwashiwana yokulandifila ashike oshiwana kashi hole ko
shaashi vati kape na ovalandi va wana.
“Otwa didilika ovalandifi vamwe hava landifile peenhele da nyika oshiponga opo tapa dulu okumonikila oiponga ile pa kanene eemwenyo davo. Vamwe ohava landifile unene popepi
nopate,” Amwele ta ti.
Okwa weda po ta ti ovanhu vamwe inava fimaneka oukoshoki, ohava kala tava landifile peenhele da kaka pe na ondwi nomilamba domeva taa kunguluka, yoo oikulya yavo ihai kala ya tuvikilwa. Amwele okwa ti ombelewa yaye oya didilika yoo vali ovakwashiwana vaAngola ve lihanena mOndangwa hava ende noinima yavo tava landifile kendiki lomangeshefelo loGwashamba.
Onghee okwa ti muni waNdangwa ota ka kufa onghatu yokuungaunga novakwashiwana vaAngola tava landifile kendiki laGwashaamba shaashi inava pitikilwa ko.