Aron Mushaukwa
John Muyamba
Lingambolo zandu yamilao ni scicaba hala kukonkiseza mulao olumelela kusula milao neli ezahezi mwa Rundu ni Katima Mulilo viki yefelile.
Balwaneli basicaba babulela kuli basali baswanela kulumelelwa kuba ni buiketelo hala mibili yabona, mi likeleke libulela kuli muuso uswanela kulatelela Bibele.
Mwa Rundu Paulus Ndumba Shikusho nanyemisize baeteleli balikeleke, kwamukopano one uongaongilwe kikatengo kandu yamilao kakabona za kulikanelela kwabaana ni basali, zwelopili yasicaba ni litaba za mabasi, ili kane kasweli kueza mikopano hala kusulula milwalo mwanaha.
Likeleke lilumelelana ni mulao wacwale obulela kuli kusulula milwalo kulumelelwa feela mwalitaba zakubitelela, sindoye, kapa bupilo bwa mushemi wamusali habuli mwakozi.
Shikusho naize baeteleli nihaba bulela kuli baziba Mulimu nikuli baeleza batu kusa eza sibi habana kolo yakuhanisa batu kueza sibi. “Milao iswanela kucinciwa haiba naha italimani ni butata, kacwalo mutomopuso wanaha uswanela kutalimwa sinca kutatulula butata bobukataza sicaba, sihlu basali baluna babanze bakungulelwa kwatuko bakeñisa milao yelatelela Bibele. Lubulela kulinaha yaluna ietelelwa kimutomopuso isiñi Bibele,” nabulezi.
Likalibe bane babulezi kwamukopano mwa Katima Mulilo, nebaize baswanela kufiwa buiketelo habaitwala, kapa batabela kubuluka mulwalo kapa awa, mi kunyatela mulao wakusulula milwalo kukabona kuli manzwi abona autwiwa.
Babulela hape kuli kuhanela kusulula milwalo kuswanasina kuhanisa babanca kuitenga mwalikezo zakusomana.
Bakafumana linzila zakuzwenga nikuyosomana kwamukunda.
“Halubuleli kuli mueze mapilusi akusulula milwalo, muasite, mwakopanye mwamezi niku aselaela mwasikiliti sa Zambezi kapa mwanaha kaufela. Selubulela kikuli basali baswanela kuba nibuiketelo. Hakikuli batu kaufela bakahapelezwa kusulula milwalo, konji hautabela, haiba hautabeli wakona kupepa mwanahao,” nekubulezi Lesley Sanjahi, mubakweli kumueteleli wakatengo kakabona zaliswanelo zabasizana mwasikiliti sa Zambezi.
“Kusulula milwalo kuswanela kulumelelwa, kakuli kusweli kuezahala kwamukunda kusina macaziba bamakete,” nabulezi.
Mulwaneli yomuñwi wasicaba Munukayumbwa Mwiya niyena nabulezi manzwi aswana, mi naize naha italimana kale ni butata bobucwale kabanana babashebile nibabasina bashemi babona, mi kusulula milwalo kukakonisa kuli milwalo yesika itekelwa yashutiwa inge isika fetuha kale kuba mushimbo obutuki kwabasizana.
“Hamubulelela basali kuli basike basulula milwalo. mutisa kuli bayo sulula milwalo kwamukunda. Pili nisikaba kale musali ni mutu yasilelezwa kilitukelo zalifasi lote. Liluko lelibobona zakulikanelela kwabaana ni basali libulela kuli mushimbe limbututu mi mulufe zona. Hamunibulelela kuli ni shimbe mbututu mi nimife yona. Semunifetula mushimbi wambututu,” nekubulezi Mwiya.
Baeteleli balikeleke bane babulezi kwamikaopano nebahatelezi kuli taba yakulumelela kusulula milwalo ikatisa kulibala milao yasizo sa Afilika, nikuapala sizo sa makuwa.
Nebabulezi hape kuli kusulula milwalo kikubulaya mi likeleke halilumeleli kubulaya.
Lingambola zasicaba hala kusulula milao litaha kulika kufumana maikuto asicaba, kasamulaho mubakweli kulikwambuyu wamakete Utjiua Muinjangue natahisize ngambolo mwandu yamilao, kuli kusulula milwalo ibe mulao olumelezwi.
Hatahisa ngambolo yeo mwakweli ya Mbuwana 2020, naize ndu yamilao iambole fataba yeo kaswanelo.