Ookansela yiikandjohogololo ya palathana nEtosha, palombwelo lyuuministeli womindhingonoko, oya kumagidha aakwashigwana haya likola okatalashe oshowo omagungu opo kaaya taaguluke nokuya meni lyondhalate yEtosha.
“Etosha ehala lyi na iiyamakuti yi ili noya nika oshiponga. Onkene inashi uka aantu ya ye meni lyondhalate ndjoka, oshoka osha nika oshiponga noonkondo,” osho kansela gwoshikandjohogololo shUuvudhiya Timoteus Shivute a kumagidha oshigwana.
Ta ti, oya lopotelwa aantu taya yungu oontanda momundhingoloko gwEtosha ashike shoka inashi pitikwa.
“Itandi kumagidha ashike aakalimo yomoshikandjohogololo shUuvudhiya, ihe otandi kumagidha kehe gumwe ta ka konda oompango ndhoka,” ta popi ngaaka.
Shivute okwa li a yelitha kutya oshigwana itashi indikwa okulikola okataleshe nenge omagungu, ihe otashi gamenwa kaashi longelwe omiyonena kiiyamakuti yi li mEtosha.
“Otwa kambadhala okupitila kooyene yomikunda, omalelo gopamuthigululwakalo oshowo aaleli yalwe opo ya taandeleke wo etumwalaka ndika,” ta ti ngaaka.
Ta gwedha po kutya otaya indile wo natango aanahambo kaaya ka lithe meni lyondhalate yEtosha.
“Ooyene yoohambo dhi li popepi nEtosha naya kumagidhe aaniilonga yawo ya hulithe po okulitha taya piti ondhalate ndjoka,” ta kumagidha ngaaka.
Ta ti, shoka inashi nika oshiponga kaaantu ashike ihe osha nika wo oshiponga nokiimuna.
“Etosha otali gamenwa omolwomatompelo ga yooloka onkene shoka nashi simanekwe,” ta ti ngaaka.
Kansela gwaKatyali Joseph Mupetami, naye wo okwa li a kumagidha aakwashigwana kombinga yoshinima shika okupitila moradio.
Omupopiliko melelo lyopamuthigululwakalo lyaNgandjera Shiimi Shangula okwa ti kehe ngoka ta ka langela okatalashe otaka pewa egeelo.
Shangula okwa li a popi ngaaka, sho kwa li ta kumagidha oshigwana shi simaneke nokugwanitha po oompango dhelelo lyopamuthigululwakalo adhihe.
“Ongandjera oya ponokelwa kaantu ya za kiitopolwa yi ili noyi ili, ye ya okulikola okatalashe, opo ya ka landithe omanga yamwe taya kongo omweelelo gokulya momagumbo,” ta fatulula ngaaka.
Okatalashe okambaambala okatoye, hoka haka monika ka fa omagungu, ihe okashona molutu.
Shangula okwa ti, elelo lyOngandjera ka li na nando uupyakadhi waantu taya likola okatalashe, ihe oye na ashike uupyakadhi waantu taya langele okatalashe momakuti.
“Aalikoli naya kale ya gongala pehala limwe, mpoka taya kala taya lala ayehe. Kashi shi ethano ewanawa momakuti mu na ashike ootenda dhi na aantu ya lalela okulikola,” ta popi ngaaka.
Ta gwedha po ta ti, elalakano kali shi lyokufuka okatalashe ka likolwe, ihe olyokugamena uushitwe.
– vkaapanda@nepc.com.na