Victoria Kaapanda
Sho oombelewa dhehangano lyoku gandja omikanda dhoku hinga oNatis dha egelulwa omiyelo lwotango nuumvo okuninga omayindilo gokushanga, aantu ye vule 90 oya li ya ngundumanene oombelewa ndhoka mOshakati Etiyali.
Aantu yamwe okwa li ya pilamene ko, ya sholola komukweyo omwuuleka.
Gumwe gwomwaamboka ya popya noshikundaneko shika,Silas Nangolo okwa ti okwa meneka ongula po05h00, opo a kale e li komeho, ihe natango kakwa li a mono omayakulo kuyele, oshoka aantu oyendji.
“Okwa li ndi shi onda kwata ondjuhxwa komulungu, ihe natango inashi kwatha sha. Otundi ngaashingeyi 08h00, ihe sigo oompaka inandi mona omayakulo,” ta ti ngaaka. Ta ti, Natis na ete po omukalo gulwe okukandula po uupayakandhi mbuka.
”Ano oshike tu na okulonga nuudhigu okumona ombaapila yokuhinga oshowo omukanda gokuhinga,” ta pula ngaaka.
Nangolo okwa ti, aantu oyendji oya shunithwa monima koombapila dhokuhinga itaa ye dhi mono, omolwa ya patekena oku dhi konga. “Natis na nengeneke oompango nomalandulathano ge gokugandja omikanda. Uupyakadhi mboka owa dhigupalela oonkalamwenyo dhetu,” ta ti ngaaka.
Ta ti, hakehe gumwe a mona ompito yokuya kosikola, ye hakehe gumwe e shi okulesha. Onkene ngele omuntu oku shi okuhinga oshike itaaka tutswa lumwe mopate inaa shanga. Silas Thomas omuniilonga gwomositola Woerman Brock okwa ti okwa li a ihakana ompito ndjoka, ihe ota shuna ashike kiilonga inaa mona omayakulo.
“Ondi na okuya kiilonga, ngele onda kala momukweyo moka itandi ka za mo mbala,” ta nyenyeta ngaaka. Thomas ta ti aantu oyendji oye li mompumbwe yomikanda dhokuhinga.
“Uupyakadhi mboka ou na oku kandulwa po ashike kuNatis ye mwene. Sha ikwatelela komushangwa gwapitithwa kehangano lyoopate lyoRoad Authority (RA), oombelewa adhihe dhoNatis moshilongo odha patulula omiyelo dhawo Etiyali. “Oofoloma itadhi ka tulwa we momapakete ngaashi omumvo gwa yi, ihe kehe gumwe otaka shuna nofooloma ya shangwa esiku te ya okushanga,” osho uuyelele tau ti ngaaka. Opolisi esiku ndyoka okwa li ya kunkilile oshigwana shi kale sha kotokela ookalyamupombo. “Aantu ayehe ye li mpaka inaye ya okushanga, onkene inamu itaala shoka tamu ka lombwelwa komuntu kehe kombinga yokumona omukanda mendeelelo,” ya kumagidha ngaaka.
– vkaapanda@nepc.com,na