Ministeli zonondima, mema newapukururo evhu kavazeresere eyi yina kara asi kutwara nongombe ndi yimuna okarandese koSouth Afrika kapi vana yisilike, kukwama nombudi edi dina kupupana monkarapamwe. Monombudi edi dina kuzuvhika kavageve moutano kutunda koministeli, nokutanta asi nsene ono hara kutwara nongombe doge okarandese koSouth Afrika wahepa kugwana mbapira pulisiro kovanganga yimuna zepulisiro wosirongo saSouth Afrika. Ntumwaraka kuna kutanta asi owo vana kutwara nava vana kureta yimuna yawo, vahepa kupitira momalikwamo gana kara asi kuna kukwama veta zoukanguki vana kutumbura asi Animal Health Act, (Act 1 zomo 2011). 

‘’ Namibia kuna kukapulisira ava vana kureta nokutwara ngombe pamundinda ndi nondja ndi asi wayi wonongombe, kukwama veta zetu ezi zakarapo kupitira movanganga yimuna,’’ yimo vana kutanta ngoso. Simpe kuna kutwikira kutanta asi Namibia apa tuna kuhuyunga ngesi kuna kara momaliyongo kumwe naSA, omu vana hara asi ngano veta ezi avaruganesa woyimuna vazitjindji ngwendi kureta wayi, Lucerne, ntani wayi nkenye yahepa tupu kukwama veta ezi zakarapo zo World Organisation for Animal Heatlh (WOAH). 

Yihepwa nayinye yapumbwa kuna kara wayi vahepa kuugwana komavango aga gakara asi vagatura paveta yipo asi vahakara asi kapi validiva nawa, morwa kuna kumoneka ngesi asi evango nye eli avagwana wayi ngesi unene oku ava upungura lina zura unene, ntani kuna kara evango lyoupyu una siki ko 80% Degree Celsius. Mokuhetakana, nondja donongombe kwawapera tupu kuditura mevango lyokupungwira makwedi gane, ntani ehauto nye omu una kugendera wayi owo lyahepa kuzera ntani vahepa kulipombera mutji ogu vana pulisire vakungi yimuna yipo asi yahagwana mukisi  gokana nokakondo. 

–Nampa