ONGWEDIVA – Omauliko giipindi mOngwediva ngoka haga ningwa omumvo kehe nuumvo otaga gandja ompito kaauliki yiipindi ye vule 450.

Okuza oshiwike tashiya oondjila adhihe odha taalela kOngwediva sho oshiindingili shoka tashika tameka momasiku 23 sigo 31 Aguste nuumvo.

Omupeha nashipundi melelo lyondoolopa yOngwediva Evat Kalondo okwa ti, omauliko giipindi okwali ga patuluka lwotango momumvo 2000, nonuumvo oge li kohi yoshipalanyolo koshiyoshipalanyolo “okuyoolola omuthigululwakalo nokuyapo nomandhilandhilo omape”.

“Iipindi mbyoka ohayi gongaleke aanangeshefa oshowo aantu yaza ko kule, taya ulikilathana uunongo niilonga yawo mehala limwe,” ta popi ngaaka.

Kalondo okwa ti, nuumvo oya tengeneka okukala ye na aawuliki yiipindi ye vule 450 okuza koombinga noombinga oshowo taya zi kondje yoshilongo.

Ta ti, elalakano okugandja ompito kaanangeshefa oshowo komahangano ga ulike iishingithomwa yawo oshowo okugalulila eliko mondoolopa yaNgwediva oshowo moshilongo ashihe. 

Omawuliko giipindi otaga ka ulika iilandithomwa ayihe okuza kiikulya, kiizalomwa na kehe shoka hashi vulu okweetwa po noonyala oshowo okweeta oombelewa hadhi gandja omayakulo ga pumba popepi. 

Mayola gwondoolopa yOngwediva Tarah Shalyefu okwa ti, omawuliko giipindi gonuumvo otaga ka kala ga yooloka komakwawo, oshoka otaga ka gandja wo ompito natango kaanangeshefa mboka itaya vulu okuthika.

“Omauliko giipindi gonuumvo otaga ka kala ga yooloka komakwawo oshoka otwa longekidha oyindji iiwanawa ya yooloka kwaambyoka ya holoka nale,” ta popi ngaaka.

Shalyefu okwa hiya oshigwana ashihe opo shi thiki komauliko giipindi ngoka taga ka kala gena omayakulo ga yooloka ga e twa po pi.

– vkaapanda@nepc.com.na