Auleria Wakudumo
Omukainhu womido 24, okwa yandja omaano oidjalomwa kovakainhu nounona moshipangelo shaNandjokwe, ongoshitukulwa shetyapuloledalo laye.
Melania Nangolo okwa ti eshi okwe shi ninga e likolelela kepopyo lomupresidente mukulu wAmerica, John F Kennedy, ta ti ino pula eshi oshilongo shoye tashi dulu oku ku ningila, ndele lipula kutya ove oto ningile shike oshilongo shoye.
Nonande Nangolo ke na oilonga, okwati okwe lihongela oupangi nokwe lideula moipangelo yepangelo ihapu. Melideulo laye,okwa koneka kutya luhapu ovakulukadi haaveshe hava kala ve na ovakwafeli moulefimbo wokulihumbata. Naluhapu ohave ya koshipangelo pefimbo lokupulumuna vehe na nande oikutu younona ile vamwe ove na ashike ounima vanafangwa vounona. Oinima ngaashi omilambo noikutu younona oya pumbiwa okukwafela mokudika ounona konima yokupulumuna.
“Molwaashi, ekwafo nomaano a dja kwaame, kookaume kange oshoyo ovakwanedimo, onda tokola opo ndi ha ninge oshitufi odula ei opo ndi tyapule pamwe nounona ovamati noukadona ava va dalwa mefiku lange. Onda tokola kutya odula ei itandi lande omaviinyu, eengala ile ouleke,” Nangolo ta ti.
Nangolo okwa yandja oipumbiwa younona ngaashi omilambo, oikutu noinima ya wedwa po younona. Ounona omulongo (ovamati vatano noukadona vane) va dalwa mefiku limwe naNangolo ova mona ekwafo okudja kuye. Oipumbiwa aishe oya kosha N$3 000.
Kakele kounona ava va dalwa mefiku limwe naNangolo, okwa kwafa yoo ounona ovo inava dalwa mefiku laye. Okaana kamwe vati ina okwa xulifa, paife oke li ashike moshipangelo ka teelela ou te ka kufa po.
Nangolo okwa ti okwa yandja, ndele hamolwaashi e na shihapu, ndele oku shi shi oululume wokehe na sha.