OSHAKATI – Ngoloneya woshitukulwa shaShana Hofni Iipinge okwa ti ota twikile okuyambidida eefikola eshi natango a yandja oitaafula omi-30 noipundi kofikola Mwadina Gwanembenge SS i li mOshakati.
Oikwafifohongo ei oya yandjwa Omaandaxa nelalakano lokuyambidida ovanafikola ve lihonge nondjungu.
Ngoloneya okwa ti osha fimana ngeenge ovanafikola tave lihongele momudingonoko muwa shaashi otashi va tu omukumo ve lihonge nawa.
“Ovanafikola ovo ovaleli vokomongula tava ka ninga ovanashilonga momaifano a yooloka. Osha fimana ngeenge hatu yambidideni eefikola,” ta ti.
Okwa twa ovanafikola omukumo opo ve lihonge nondjungu nokufimaneka ovahongifikola vavo.
Iipinge okwa kumaida ovanafikola opo va kwatwe nawa oipundi noitaafula oyo va pewa.
Omukulunhufikola pofikola Mwadina Gwanembenge, John Shiyavali okwa pandula ombelewa yangoloneya eshi tai twikile okuyambidida eefikola.
Okwa ti oipundi noitaafula otai ka eta elunduluko liwa kovanafikola shaashi paife itava ka shangele vali va tula omambo kolutu.
Okwa didilikwa ngoloneya waShana okudja omudo wa dja ko eshi a ya koshipundi a kala nokuyandja omakwafo koshiwana unene tuu ovanhu ovo ve li momhumbwe.
Ovakulupe navo ova mona omauwa okuyambididwa okupitila mombelewa yangoloneya ou.
Omwedi wa dja ko natango, melongelokumwe nehangano loRani Group, Iipinge ova yambidida ovalihongi omu-11 eshi va futilwa ofikola noshimaliwa N$140 000.
Ovalihongi okwa li ve na eendjo doshimaliwa sha pumbwa okufutwa koiputudilo yopombada.
Oimaliwa yeendjo oya tulwa koumbo veembaanga doiputudilo haku fikola ovalihongi ava.
Konima yoivike itatu natango, Iipinge okwa li a yambidida ovanafikola eshi va pewa omidjalo dofikola, mwa kwatelwa omapando eenghaku.
Okwa pula omahangano a yooloka e na ehalo lokuyambidida eefikola opo a kwatafane nombelewa yaye.