Abraham Mwanyekange
Ngoloneya woshitukulwa Ohangwena Kadiva Hamutumwa okwa pandula ovadali osho yo elelo lofikola yaSakaria Shikudule eshi va longela kumwe noshiwana okutungila ofikola omuhandjo wofikola. Okwa ti osha ulika elitulemo nelongo noudiinini mehongo.
Pefimbo a talela po ofikola oyo i li moshikandjohongo Ongha, Hamutumwa okwa ti epangelo efimbo limwe nalo ohali kala lihe na oshimaliwa shokukandula po omikundu deefikola. Okwa indila nokutwa omukumo ovakalimo vopopepi nofikola opo va longife okashona aka ve na po ve ka longife opo va lundulule ehongo lokaana Okanamibia.
Ombelewa yangoloneya waHangwena oya yambidida Shikudule noshimaliwa N$30 000. Oshimaliwa otashi longifwa okutula mo olusheno metala lokulila osho yo okulanda okila yokutalaleka nefiya lokuteleka. Aishe oyo otai ka lundulula oikulya oyo hai pewa ovalongwa efiku keshe.
Ngoloneya okwa ti ope na omhumbwe yopate ya pumbwa okutungwapo ya uka kuShikudule. “Omhumbwe oya pumbwa okulikundwa nakansela woshikandjoohololo sheni shEndola. Opo elandulafano eli li li mondjila li landulwe, nongee osha ningwa nena oupyakadi otau kandulwa po,” ta ti. Okwa ti eepate diwa otadi vatele ofikola osho yo oshiwana.
Etalelepo langoloneya ola kwafela opo a shiive ehumokomesho, omaupyakadi osho yo eemhumbwe dofikola. Ngoloneya okwa udaneka ta ti ota twikile nokuyambidida eepolohalama odo tadi lundulula onghalo yelihongo nokumona kutya okaana Okanamibia ka mona ehongo li na ongushu.
Omunashipundi wewiliko lofikola Phillips Nehemia naye okwa yandja ekemo laye shi na sha nopate. “Okapate oke li monghalo ii unene tuu pefimbo eli lodula. Ngeenge efundja le ya, ovalongi, ovanafikola novakalimo vopomudingonoko ohashi va ningile shidjuu okufika kofikola,” ta ti. Okwa ti omahauto ohaa nyonauka molwonghalo yokapate.
Okwa pula epangelo opo li tunge opate meendelelo i li pamufika u li nawa. Ta ti ngeenge opate oya tungwa itai ka vatela ashike ofikola. “Opate otai ke shi ninga shipu unene kwaavo va hala okuya va ka mone omayakulo kokapangelo kOnekwaya yokOuninginino osho yo omudingonoko aushe waapo.