Charles Ndeumane
Elelo lyondoolopa yOutapi olyi li metifa okwiilongekidhila otonamende yomaudhano tayi ithanwa Outapi Mayoral Cup ndjoka ya thanekwa yi ka kale ko okuza momasiku 7 sigo 10 Sepetemba 2024.
Otonamenda oya nuninwa okuyambula po uukolele wolutu oshowo onkalonawa yopamadhiladhilo, oshowo okunkondopeka omakwatathano gopantu momudhingoloko.
Otonamende yOutapi Mayoral Cup otayi lalakanene okweeta aagundjuka pamwe okupitila miinyangadhalwa mbyoka tayi tungu yo oyi na omauwanawa ngaashi okukwatela po uukolele wolutu oshowo onkalonawa yopamadhiladhilo. Otonamende oya kwatela mo omaudhano gokatanga kokoompadhi kaanyasha, okatanga kokoompadhi kaakokele, oshowo okatanga komokambamba. Elelo olyi wete kutya iinyangadhalwa yoludhi ndoka otayi yambula po aagundjuka yomoshitopolwa moka oshowo oku ya kaleka kokule niinima mbyoka tayi teya po oonkalamwenyo dhawo ngaashi elongithonayi lyiikolitha, iingangamithi, oshowo okukutha ombinga muumbudhi.
Omunambelewa gwiipambele yoshigwana melelo lyondoolopa yOutapi Joolokeni Haidula okwa ti aakalimo yomOutapi oya kala nokupula elelo lyi ya ningile iinyangadhalwa yoludhi ndoka. “Elalakano lyetu okweeta po omudhingoloko omwaanawa t gu yambula po ombepo yuudhano oshowo ok pa aalandithi ompito ya ulike iipindi yawo yo yi imonene iiyemo shoka tashi yambula po onkalo yawo yopamahupilo,” osho Haidula a ti.
Otonamende oya thanekwa yi kale yimwe yomiinyangadhalwa iinene yo oya simana mondjokonona yelelo lyondoolopa ndjoka, tayi nana aaholi yomaudhano oku za koombinga adhihe dhoshilongo, noondando tadhi hokitha otadhi ka yangatwa po kaasindani momaudhano ga yooloka.