Jazema Hangero

Dave Veziruapi Rukero omupiuke movyombazu u nongendo nomuihamwatima nomuano oviṋa tjiva vyombazu mbu vi ungurwa.

Na raisa kutja tji vi ha petererwepo ombazu mai pandjara onḓengu.Omayamberero omeero wapamwe wotjiwaṋa okuyandja ondjozikiro komundu poo ovandu mba rara poruveze rorive ndo. 

Okuyambera okupaha otjiwa notjiyangapara nokuzemburuka ovakuru mena roviungura oviwa mbi va ungura. Omundu tja ungura oviṋa oviwa u zemburukwa na pewa ondengero kaaṋi. 

Ozondangere onḓe tenga po okuyenda, aze keriheka nokutjivisa kovakuru kutja maku ya ovimbumba. Okuisamo ozonḓorera kokutja otjiwaṋa tji matji ya tjandje oviṋa avihe imbi ovivi vya humburuka kokure ozondjira za paturuka kape nomatemba maye rikumu komawe. Tji za mana otjiungura tjazo ovimbumba vi ya nokayao okutwa peyendo nokutja:”Oweṱe mba twe ya ma mu munu, oweṱe mba twe ya okumuvarura, matu zemburuka oviungura vyeṋu oviwa.” Ovandu tji ve ya mbo ve umbwa nomeva okukohwa onḓorera ndji ri mu vo ve yese mbo, ve yaruke ovakohoke.

”Omitanda poo otjiwaṋa tji matji i komayamberero tji yenda okukakutura ouruvi mouatjiri nungwari katji i mondondo yokukayambera ku katjiri, okukaningira ouṋingandu notjiyangapara. 

Ovandu ve yenda okukakutura omuinyo,” Rukero ma raisa omuihamwatima we na tja omayamberero oviṋa vyarwe vyovandu mba nyingisa ondjenda mbu mave ripaha, mba umana, mbu mave serekarere omakuruhungi, nokuhongasana oviuṋe nozongunḓe zombazu nungwari ka ku kapunda, okukanwa omeva wamururu, nokuhakayena monyama. Omayamberero tje ha tjevererwe nawa nokutengwa maye piti mondjira na ye kaseka tjiri! 

“Ovira vyoporotika nozokereka vya uta okukara norupa ngunda omayamberero aya sokurira otjitjitwa tjombazu pondomba. Omundu tji wa huurwa, u homonwa moundu we nongaro ye arire omundu wokunanwa, twende komanene twende komamuho. Ovandu ve katovasana nokupahasana ouṋa ouvi.”