Sîsenao-i xa xoahe hâ

Namibiab di ǂNûiǂgās hîa ǂGaoǀkhāsa ǂharugub !Harib ain xūna nî hâs ǂan!gâs Sertifikatga Māǂuis !ereamsa tani hâs (NSi), ge Meatco NCA (Pty) Ltdsa, ôa!nâdi hîa ǁamaxūhe ra ǂûn, khoen hîa nî ǁaman !aroma ǁkhōǁkhōsasi-e !khōǂgā tama hâs di ǂkhîǂkhîxasib di ǁgauǁgaus ase ra !khō!oahe sertifikati (HACCP) ti a ǂansaba ge mā. 

Nē māǂoahâ sertifikata !khō!oas ge ra ǁgau, nē ǂnûiǂgās ǂhaitsise ǁguiǂgāsen hâsa, ǂgaoǀkhāsa ǁguiǂamdi hîa !norasasib tsî !gâiǂâuhâ !harib ai hâ ǁgan-es ra ǁamaxūs disa. 

Nēs ǀkhas ge Meatcosa ra ǁgau ǁîs Namibiab !nâ ǂoaǂamsa ǁgan ǂharugub di ǁgoeǂam !harosa noxopa !khōǀgara hâsa. 

HACCP ǁgauǁgaus sertifikati ge !auga!hūsise a ǂan!gâsa !haros hîa ǂûn tsî ǁgan-i !norasasib ai ra ǀnōhesa tsî ǁkhāti dana !âs ase ǂgarib tsî sîsenǀgaub ǂûn tsî ǁgan-e aiǂhomis dib !nâ ra mâǂoa. 

Nē ǂan!gâsa !khō!oas ge ra ǂgaoǀkhā, ǂnûiǂgādi nî ǁaeb ai hâ ǁkhā ǁkhōǁkhōsasiga ôa!nâ, ǂanǂui tsî oresa hōba !khaisa, ǁawoǁawos ase -în ǁama-aon nî !norasa tsî ǀgapi ǀgaub !nâ hâ ǂûna !khō!oa !khaisa. 

NSis di Dana Sîsenǂuira Mâisab (CEO), Eino Mvulab ge ǁîb di !gâiaǂgaoba ǁgauǂuis ǀkha ge mî “Sida ge buruxase Meatco NCA (Pty) Ltd di !khō!oas HACCP sertifikata dis ai a ǂnīsa. 

Nē ǁgoeǂams !harosa sī!nâs ge ra ǁgau, nē ǁganǂharugub ǂnûiǂgās di ǁguixasib tsî ǁguiǂgāsens ǁîs ǁama-aona ǂgaoǀkhāsa !harib hîa ǂûn tsî ǁgan-i !norasasib ai ra dīǀoaǀoab ai !gaoǁgui hâ !khaisa. 

Sida ge NSI sîsenaoda ase, hoa !hūb a ǂhabase hâ ǂnûiǂgādi, Namibiab sâuǁkhāsib omkhâ ra !âhurudi hoadi !nâ nē ǂgaoǀkhādi ai nî dīoaǀoase isa ra ǂgaoǂgao!nâ, tsîs ge Meatco NCA di sī!nâsa buruxa îxa aiǁgause hoada ība”. 

NSi di !ereamxasib ge, Namibiab ǁguihâ ǂgaoǀkhādi, ǂâuǀoasasib !nâ hâ !oabade mās dide omkhâi tsî ǂgaoǂgao!nâsa. 

Mvulab ge gere mîs ge, HACCP sertifikata !khō!oas ra ǁnāti ī ǂgom!gâb, ǁama-aon ǂnûiǂgā-i !nâ ūhâba ǀgaiǀgai tsî ǁawosasiba māsa, ǁaman ra xūnan a ǂgom!gâ ǁkhās diba, !hū!nāsise tsî !auga!hūsi ǂgaoǀkhādi ai ra dīǀoaǀoase.