Auleria Wakudumo
Festus Hamalwa
Nonande efiku lomapendafule ola li la udifa nai ovakwashiwana moshitukulwa shaShikoto eshi la li la kalekwa nokupingakanifwa nOvenduka odula ya dja ko, Ovashikoto neudo ove lilongekida okutambula ovaenda.
Efiku lomapendafule olo ohali dimbulukiwa alushe mo26 Auguste, ohali ningwa medimbuluko loshiningwanima shomo1966 omo mwa luwa oita yotete yekondjelomanguluko.
Ngoloneya waShikoto, Penda Ya Ndakolo meenghundafana naKundana okwa ti aishe oi li peenhele nove lilongekida okutambula ko ovaenda okudja koitukulwa aishe yoshilongo.
“Ohatu pandula omuleli woshilongo e tu tetekela nale, omufimanekwa Hage Geingob, shaashi oye kwa li a eta ediladilo opo efiku lomapendafule li danenwe mOmuthiya odula ya dja ko ndele Kalunga ine shi pitika, notwa hala yoo okupadula omuleli wetu omufimanekwa Nangolo Mbumba eshi efiku eli tali danenwa moshitukulwa shetu neudo,” Ya Ndakolo ta ti.
Kakele kokudimbuluka efiku eli, oshitukulwa shaShikoto otashi ka mona omauwa ahapu. Ya Ndakolo okwa ti ovanangeshefa va yooloka otava ka mona oyuuyemo i li pombada. Efiku otali ka longa unene oshiwana shokomongula ondjokonona yemanguluko loshilongo. Oshiwana otashi ka tala nokulihonga omatanga eameno a yooloka moshilongo.
“Onghene ohandi shiiva ovanhu aveshe okudja koitukulwa aishe yoshilongo opo ve uye tu waimine pamwe, okudimbuluka nokutumbaleka omapendafule oshilongo”. Ya Ndakolo ta weda po.
Ya Ndakolo okwa kwashilipaleka oshiwana shaMuthiya kutya eedila tadi tuka ponhele opo kadi fi dowii, ndele otadi lilongekidile efiku lomapendafule. Onghene oshiwana inashi mbadapala.
“Ovalandifi otava ka pewa omhito yokulandifila meni, ashike otashi ningwa pamulandu”. Ya Ndakolo okwa ti keshe omulandifi a hala okulandifa na ye kombelewa yaye opo a shangife onhele yaye. “Itapa landifwa ashike kukeshe umwe ta di oko,” ta weda po.
Ovakalekipo vombili ovapolifi, ovakwaita oshoyo omatanga a wedwa po ngaashi okomando ovo hava nhuka meedila otava ka kwashilipaleka ombili oshoyo elandulafano mefiku eli.
Oshiwana otashi indilwa shiha ende neembele oshoyo oinima ya honga okuya monhele tamu ka danenwa oshitufi.
Ovanangeshefa vahapu pomatala oshoyo peenhele da yooloka mOmuthiya ova pandula eshi efiku lomapendafule tali dimbulukilwa mOmuthiya nove na omukumo kutya otava ka mona oyuuyemo i li xwepo mefiku olo tuu olo.
Ova hokolola tava ti ove na omukumo wokulonga oshimaliwa shihapu molwaashi odoolopa otai ka hada ovanhu veendodo da yooloka.
Oshivilo shedimbuluko lomapendafule neudo otashi ka popifwa kOmupresidente Nangolo Mbumba.
Pefimbo Kundana a taalela po omatala aMuthiya onghela, ovalandifi ova hokolola nehafo tava ti ove lilongekida okukala va yakula nawa oshiwana noilandifomwa ya yooloka.
Ngoloneya woshikutukulwa shaShikoto Penda yaNdakolo okwa koleka ta ti ovanangeshefa otava ka pitikwa okulandifila monhele omo tamu dimbulukiwa efiku lomapendafule.
“Ei oyo omhito iwa kovanhu okulandifa oilandifomwa yavo yOshiwambo noshoyo oikulya yOshiwambo. Ovanhu otava ka mona oyuuyemo molwaashi odoolopa otai ka hada,” ta ti.
Okwa kumaida oshiwana opo shi lihumbate nawa pefimbo ledimbuluko lomapendafule.
-fhamalwa@nepc.com.na