Charles Ndeumane
Opolisi mOkahao oya lopota kutya okila yayo yomidhimba ka yi na we ehala lyomidhimba omipe, ta yi indile aakwanezimo yoonakusa ya ka tale ko omidhimba dhaaholike yawo.
Inspector Anna Kunga gwopolisi moshitopolwa shaMusati okwa lombwele onzonkundana ndjika kutya okila yomidhimba yopolisi mOkahao oya ninga ethimbo ya udha molwaashoka aantu ita ya ka tala ko ombidhimba dhoonakusa pethimbo.
Kunga okwa ti okila ndjoka oha yi kala ya udha iikando oyindji oshoka omazimo gamwe oha ga ende kashona moku ninga omalongekidho gomafumbiko. “Dhimwe dhomomidhimba ndhoka dha udhitha okila odhaakwiilongo, unene ngaa aashindalongo yaAngola. Uuna aakwiilongo ya hulithile muno ethimbo limwe oha shi kwata ethimbo ele oku kwatathana naakwanezimo opo ya ileko omidhimba,”
Molwaashoka ka pu na we okila yilwe yomidhimba ta yi vulu oku longithwa mOkahao, Kunga okwa ti omidhimba omo ashike ha dhi timwa mokila ndjoka nande oya udha noonkondo. “Omidhimba omo ashike dhina oku tulwa mokila moka nande ka mu na ehala, dha thinana. Kashili nee nawa oku kaleka omidhimba mokila dha thinana, onkene ota tu indile aantu mboka ye na oonakusa yawo mokila yopolisi yaKahao ya ninge omalongekidho gomeendelelo opo ye ked hi taleko mbala”.