Charles Ndeumane
Omuleli gwongundu yoAffirmative Repositioning (AR) Job Amupanda okwa ti aanyasha yaNamibia oya pumbwa okukwathelwa meendelelo oshoka otaya kanitha einekelo monkalamwenyo molwonkalo yokwaa na iilonga nenge aakwatheli.
Pethimbo a li moonkundathana noshifokundaneki shika Amupanda okwa ti metalelepo lye kondoolopa yaKatima Mulilo okwa ndhidhilike kutya aanyasha yomoshilongo oye li monkalo tayi yemateke molwokwaa na oompito dhiilonga.
“Ondi li moKatima tandi talelepo aakalimo ndi tale onkalo moka ye li nomashongo ngoka ya taalela. Onda tsakaneke omumati omugundjuka ta lombwele ndje kutya oha longitha iingangamithi nomalovu sha pitilila oshoka ke na we einekelo monkalamwenyo, ke na iilonga nenge shimwe sha simana shoka ta longo monkalamwenyo,” Amupanda ta ti.
Amupanda okwa ti okwa koneke wo kutya aanyasha mboka ya longwa ngashiingeyi nayo otaya kanitha omukumo, nayo otaya kutha ombinga melongitho lyiingangamithi nomalovu oshoka oomvula otadhi piti ashike kaa ye na iilonga. “Ngashiingeyi aanyasha mboka ye na oonzapo dhopombanda oyo taya longele aalongi yiimbuluma mboka ya ndopa nale oosikola, oshoka kaye shi we kutya naya ninge ngiini,” osho Amupanda a ti. “Shoka twa pumbwa ngashiingeyi okuya po nomikalo dhokweeta po oompito dhiilonga oshowo iinyangadhalwa tayi kwathele aagundjuka manga kuyele, oshoka onkalo ndjika kayi li nawa. Opu na aagundjuka mboka kaaye na iilonga ashike oye na oonzapo, po opu na aanyasha mboka kaaye na iilonga noompito dhawo dhokumona iilonga oonshona oshoka kaye na oonzapo nenge uunongo washa. Otwa pumbwa aaleli yu uvite ko oonkalamwenyo dhaanyasha oshoka omuntu ashike ngoka e uvite ko aanyasha ta vulu oku ya pa omukumo neinekelo monkalamwenyo,” osho Amupanda a tsikile.
Kakele koompito dhiilonga ndhoka kaadhi po, Amupanda okwa ti iinyangadhalwa yilwe mbyoka hayi vulu okukutha aanyasha momapandaanda ngaashi oongalo oya sa, ngaashi oNamibian Music Awards (NAMAs) ndjoka ihaa yi ningwa we. “Onda mono ostudio yoongalo molukanda moKatima, ehala lyi li nawa shili ashike kapu na ngoka ta kwathele aagundjuka mboka ye na oshipewa shokwiimba. Omumati gumwe mostudio okwa lombwele ndje ta ti shoka sha simana ngashiingeyi okugandja omakwatho ndele haku ninga iikonga yomahogololo”.