Dana ǂNoaba-ao Xenerals, Martha Imalwas ge Dana ǀGapi ǁNâu!gâ!khaib ǁga ǂganamsensa ge dī, ǁnāti ī mā-ams hîa ra mîs, is ǂnoaba-aon nî mātarehe maris, ai!âkam ǁau!khōs ministeri, Bernhardt Esaub disa ǁîb di ǂhanusise a ǂgaeǂgāsa xūn di ǁkhāsiba xu mātarehe ti ra mîs nî ǂgae-oahesa. ǁNāti ī mā-ams ge ǀgūǁ-ae ǀAeǁgams ǀGapi ǁNâu!gâ!khaib ǀGora!gâ-aos, Beatrix de Jagers xa ge dīhe. ǂNoaba-aob, Florian Beukesi hîa Esauba -ǁîb ge !khōsis !nâ a ūhesa xu ǂhanusi !oabade ra māb ge, ge ǂoa ge wekheb di Wunstaxtsēs ǁnâu!gâs !nâ ge ǂanǂan, tsēdi hîas nēti ī ǂganamsensa, ǀgorasa dīs nē Fishrot ǁhōb !nâ ra ǂâisāhegu !aroma nî dīhesa, ǂgans hîab ge ai!âkam ǂhanu-aisib ministeri Sacky Shangula ǂgan hâ ise. 

Beukesi ge ǀAeǁgams ǀGapi ǁNâu!gâ!khaib di ǂnûǁkhaeba ra ǀgora!gâ-aob, Moses Chinhengoba ge mîba ǁîb ge nē ǂganamsensa ǁkhawa kō!gâhesa ra mâ!oa ǂkhanina a māǂgāsa. ǁKhātib ge ǀgora!gâ-aoba ge mîba, ǁîb ge Esaub xa a ǂguiǂamhesas, îb ǀgoras ǂganamsens hîa Shangalab, James Hatuikulipib tsî Pius Mwatelulob hâgu disa !nâ !â. Beukesi ge ai!â ǀgora!gâ-aoba ge mîba, ǁîb noxopa Esaub ǂnoaba-aosa nî hâǀgarasa, ǀgoras ǂganamsens tsî Dana ǀGapi ǁNâu!gâ!khaib !nâs tsîna, xawe kha Dana ǀGapi ǁNâu!gâ!khaib !nâ nî !gâi!gâ tama is kara, ob -îba ǀnîb nî dī xū-e ūhâ tide tsî nē ǁnâu!gâs ǂnoabasa xu nî ǂgae-oasen !khaisa. ǁîb ge mîs ge, Esaubab !kharu ge !nona kuriga ǀguis khami ī mātare-e !khō!oa tamase ǂnoaba!goaxasa tsîb nēsa !aruǀî dīǁkhā tidesa. 13 Taraǁkhumuǁkhâb 2024 dis ge datoms hîab ǀgora!gâ-aoba ǀgoras ǁnâu!gâtsēs ase ge māsa. ǀGora!gâ-aob ge ǂhanub tsî hâ ǁkhā a khoena ge ǂgan in Taraǁkhumuǁkhâb 2024 dis ai ǀunitsēs ase ǂanǂan. Shangalab ge ge mî, nē datomdi ǂauna ǁaeba -îga mā tama ra isa, ǂHanub nēs ai mâti ra !ereams tsî ǁnās ai oe-ams !aroma. 

Ricardo Gustavob tsîn ge ǁîb ǂkhîo!nâsiba nē ǁhōb ai mā tsî ǀgora!gâ-aoba ge mîba,ǁîb ge Destaxtsēs ai gui ǀaeǁgâuba xu a ǂoaxa tsî ǂauna ǁaeba ūhâ tama hâ isa, hoa xūna khomai!kharu!nâ tsî ǁîb di mâ!hūsa māsa.