Auleria Wakudumo 

Opolifi oya kumaida ovadali va findikile ounona vavo noku ke va tala ko keefikola, omolwoipofa yoimbuluma yopaixulo oyo tai ningilwa unene uunona ngeenge tava di ile tava i kofikola. 

Inspector Frieda Shikole okwa yandja ekumaido olo molwoiningwanima yomakwatonghonga ihapu tai ningilwa ounona meendjila dokudja nokuya kofikola. 

Shikole ta indile ovadali osho yo eefikola di longe ounona okuenda moungudu okuya ile okudja kofikola peemhito opo tava ende vehe li nomukulunhu, opo va dule okulopota ngeenge umwe womuvo a kwatwa po komunhu a nyika oshiponga.

Oshiningwanima  shitalala osha ningwa mEtitano lwopo13h15 metungo ihali longifwa vali moShinime mOndangwa eshi taka di kofikola omo vati okaana ka ponokelwa nokukwatwa keenghono manga ka li mondjila oko akeke okudja kofikola. 

Omufekelwa ehe shiivike okwa dilila okaana konima ndele ta pe okaana okaradio kashona ihaka longo opo vati e ka twale komumati umwe ha kombo opate ashike okaana oka anya. 

Nokonima omufekelwa okwa kendabala vati okuyandja ouleke kokaana ashike natango okaana oka anya okutambula ouleke. Eshi a mona kutya okaana inaka hala, okwa ekelashi vati okaradio momwiidi ndele ta tumbu okaana mofingo nokukatumbila metungo la kulupa, ihali longifwa vali omo a kwata okaana keenghono.  Omufekelwa vati okwa lombwela okaana kutya vati ngeenge ka i keumbo, naka ka konge omumati opo ka twikile okuninga eshi omufekelwa e ka ningila. Konima eshi a mana okukwata okaana onghonga, okwa faduka po.  Okaana okay a keumbo taka kwena nokulopota oshiningwanima kuinakulu oo a lopota oshiningwanima pefimbo opo.  NOmufekelwa oo ta fekelwa omudjaidjai ina monika natango. 

Natango mOshikoto, okaana keedula 10 oka kwatwa keenghono komulumenhu weedula 34 momukunda Okamutyasha mOkaku. Oshingwanima osha ningwa oufiku po 21h00 komaandelo aAuguste.  Shikole okwa koleka natango oshiningwanima eshi. Omufekelwa oku li omushiinda nanakuninga oshihakanwa. 

Shikole okwa ti vati lwopo 20h30, omufekelwa okwa talela po eumbo omo hamu di nakuninga oshihakanwa nokumona kutya ounona monduda ove li mo vahapu nova finana mo. 

Omufekelwa vati okwa lombwela nakuningwa oshihakanwa pamwe nokaana kakwao okamati kutya nava ka nangale konduda yaye. Nakuningwa oshihakanwa opamwe namukwao vati ova ka nangala keumbo lomufekelwa. 

Mokati koufiku, omufekelwa okwa kwata okaana keenghono. Nakuningwa oshihakanwa okwa lopota oshiningwanima kuina ongula nokulopota kopolifi. 

-wakudumoauleria@gmail.com