ONGWEDIVA – Opolifi moshitukulwa shaMusati oya kumaida ovakulunhufikola opo va twale omaliko eefikola koitaashi shopolifi pefimbo lefudo.
Omupopiliko wopolifi moshitukulwa shaMusati Inspekta Anna Kunga okwa ti elalakano opo kukelelwe oumbudi weefikola tadi vakwa omaliko.
Kunga okwa ti pefimbo lomafudo eefikola dihapu moshitukulwa shaMusati oda ninga oihakanwa yokuteywa kookalyamupombo.
“Otwa kendabala opo tu longele kumwe neefikola okukandeka oumbudi wokuvaka omaliko keefikola,” ta ti.
Inspekta Kunga okwa ti moule womafiku avali konima eshi eefikola da pata, okwa lopotwa ofikola Akayupa Combined School ya ponokelwa kookalyamupombo nokuvaka mo oilongifo yofikola.
Okwa ti omaliko okwa monika konima eshi oshiwana sha longela kumwe nopolifi.
Okwa ti osha fimana opo omaliko oo e li keefikola a twalwe koitaashi yopolifi pefimbo lomafudo.
“Ovanambelewa vopolifi ove lilongekida efimbo keshe okukala va tambula omaliko okudidilila keefikola opo a kale meameno,” Kunga ta ti.
Okwa weda po ta ti itashi ulike efano liwa ngeenge eefikola da kanifa omaliko epangelo unene tuu eekompiuta.
“Ngeenge eshina lonhumba ola vakwa po otashi shunifa elihongo lovanafikola pedu molwaashi itava ka dula vali okulongifa eshina olo,” ta ti.
Okwa kumaida oshiwana opo shi twikile okulongela kumwe nopolifi okulwifa oimbuluma.