EENHANAS – Eenhanas !ās ǀawemā!nans di Dana Sîsenǂuira Mâisab, Gabriel Benjamini ge !ā!nāsi ǂharugub ǀhûhâsiga gere ǂgan, in ǀawemā!nans ǀkha nî hâ sîsenǁareba ǂnuwi tsî !ās âna omkhâi. ǂOa ge wekheb Wunstaxtsēs aib ge ǂharugu-aon ǀkha ūhâ i ǂnûs, aiǂhomis !goaxa 14ǁî Eenhana ǂHarugub ǁGauǂuis dis tawab ge ǁîba nē ǂgansa ge dī. Nē kurib di ǁgauǂuis ge 29 ǂKhoesaob disa xu 4 Aoǁkhumuǁkhâb 2024 dis kōse nî !khoe tsî Eenhanas Convention Senters tawa nî hâ. Benjamini ge ge mî, !ā!nāsi ǂharugun kaise ǂhâǂhâsa !âsa sâuǁkhāsiba omkhâis !nâ ǁîgu ǀhûhâsigu !nâ ra ǀhurusa tsîs ge ǁnāsa ǁîna ǁâǂkhōn ǁnā !ās sâuǁkhāsib di omkhâis ǁaxasin dise ra dī, ǁîn ra sîsenga ǂnuwi tsî ǁkhāti Namibiab di hōǂgāmaris tawa ra ǀaro amaga. “ǂHâsib ge hâ, sada ǂharugu-aon tsî ǀawemā!nans tsîra nî ǁawoǁawosa ǀguipa sîsenǁares !nâ-ū ǁanǂgāsaben Eenhanas din tsēkorobe ûiga !gâi!gâis diba,” tib ge ge mî. ǁKhā soab aib ge, Eenhanas di senior danab, Sâuǁkhāsib Omkhâisens, ǂNamipeb ǂUrusib tsî ǀHûhâsib !Oabadi dib, Gabriel Mwaningab ge ǂhâǂhâsasib !ā!nāsi ǂharugugu nî sîsenǁarebas dib ai tsâǀkhā tsî ge ǂharugun di !âs sâuǁkhāsiba omkhâis diba gere ǀgonǀgon!gao. ǁÎb noxopa gere mîs ge, mâ !ā-i ǀgui-i di omkhâisens kas hoasas ge ǁguiridi hîa ǂharugugu ǀhonkhoen tsî ǀawemā!nans xa ra dīhena nî ǁawoǁawo, !gâiba nēpa xu domdoresa hîa nî !ās di sâuǁkhāsiba ǀomkhâi kaisa. ǁHao-aon hâ ge in tsîn ge ǁîn di ǂâiǂhansensa gere ǀgoragu, ǁîn gere mîsa !oas ǁîn ǂharugun di ai!gûsa ra !khōmâi tsî ǁkhāti ǀomkhâis tsî omkhâisens !ās dis tsîna ra tsâǀkhāse, sao ran ǂnamipe, !ganga ǂgaiǀons, !gae-auto mâ!khaigu tsî ǀhûhâsib ǂkhari-omn tsîna. ǂHarugu-aon ge ǀawemā!nansa gere ǂgan, in !auga!hūsi ǁguiri-aon ǀhaodi tamas ka i o saridi !nâs tsîna !khōǂgāhe tsî nau ǀkhāb ai ǂhaitsi ǁamaxu!khaigu tsîna !gâi!gâi!nâ. – Nampa