Ovanafikokla vavali kofikola Oshawapala Combined School ova kwatwa po shaashi va vaka eexuxwa 22 koshikuku osho shi li mofikola yavo.

Oshiningwanima osha ningwa Omaandaxa efimbo lokeengulasha komukunda Omakango moshitukulwa shaHangwena. Omufekelwa umwe oku na omido 21 omanga umwe oku na omido 24. Aveshe ovalumenhu nove li mondodo onhi-11. Omukulunhufikola pofikola Oshawapala Combined School Eugene Likuawa okwa koleka oshiningwanima eshi.

Likuawa okwa ti eexuxwa odo da vakwa po oda nuninwa oshihongwa shounamapya osho ha shi longwa pofikola.

“Ovanafikola ohava ningi oinyangadalwa yoshilongwa shounamapya ngaashi okutekula eexuxwa pofikola noshoyo okuninga oikunino,” ta ti.

Okwa ti ofikola oya tula po omilandu kutya ka pena omunafikola tava ke po omaliko ofikola.

“Otwa ninga omutumba novadali opo tu kundafane kombinga yoshikumungu eshi. Ovadali otwe va kumaida opo va popye nounona vavo komaumbo molwashi itashi ulike efano liwa ngeenge omunafikola tai modolongo,” ta ti.

Okwa ti pofikola yavo ina pa lopotwa nale oshimbuluma shoumbudi.

Omupopiliko wopolifi moshitukulwa shaHangwena Sergeant Simeon Haufiku okwa hokolola ta ti eexuxwa 15 di na omwenyo oda monika da holekwa meenduda omo ha mu nangala ovafekelwa.

Okwa weda po ta ti eexuwa 10 oda hangika da dipawa omanga eexuxwa mbali oda liwa po nale.

Ovanafikola ove li poshitaashi shopolifi kOngha ashike ina va holoka natango momhangu.

Omakonakono opolifi otaa twikilie.