Sawi Hausiku

RUNDUS – Ministeri, !hanaǂgās, ǁgammās tsî !hūde ǁkhawa ǀgoraǂgās dib, Calle Schlettweini ge sîsenū!nāhes, ǀuriǀurihes tamas ka i o hîǀhuruhes Kavango !āb dis hîa ǀnai ǀgaisa ǁgâib !naka hâb !oagu gere !khâikhom. ǁÎb ge ǁnā !khâikhomsa ǂoa ge wekheb !nâ ge dī, ǂhanusi ǁkhowa-ams ǁkhaisa !kharaga !khaigu ǂûna !hūb a ǂhabase !hanaǂgās tsî haiǂgās ǂgarib !nâ-ū ǀhaoǀhaos digu dis tawa. 

Nē ǁaxasib ge Kuwoko Kondja ǀhûhâsib !hanab, Kavangob Huriǂoas ǀkharib !nâ ǁgoeb tawa gere !gûǁnâ. 

Nē projeks ge Japanni ǂhanub xa mâ!gâhe hâ tsî Japan Hāǀaro ra Mariǂnûiǂuis !nâ-ū marisihuiba ra mā hîa !hanaǂgās ministeris xa United Nations Omkhâisens Proxrammi (UNDP)  ǀkha !hûǁarehâse ra !amǂgāhesa. 

Kuwoko Kondja !hanab ǁgab gere ǁnaeǁgau soab aib ge ministera ge mî, nē !hanab di ǁgoeǀgaub ra Kavango !āb amma-ū !kharu !khais khoena !gâi!gâna !khōǂgāba hâsa, !āgu ǁnāpa-ū hoa kuriba ra !khoeǂgâ amaga. 

“ǀGuis khami ī omkhâisen-i tsîn ge ǁawosa, ǂgom!gâhesa tsî sī!nâhesa ǁgam-i ose a īǁoa, nausa i a ǀoro xawe. 

Kavango !āb ge nē da ra !hoa ǁaeb ai ǀgaisa ǁgâib !nâ hâ, ǀkhurub mâsib tsî ǂam ǁgam ǁgoeǀgaub !āb dib xa ra !aromahese,” tib ge ge mî. 

Ministeri ge ai!â gere mîs ge, Botswanab khoen hîa ǀuniga nē !āba xu ra domdoren ǀnai ǁgam-i !gomsiba !nāsase ra hō!âsa, Namibiab khoen nî !gaesens xa. 

Schlettweini ge nē !āb ǀnom-ammi ai ǁanhâ ǀhûhâsigu khoen ai ǂgansa ra dī, !āba hîǀhurus tsî ǀurixa kaisa xu ǂgōsensa, xawe nē !āba kaise a ǂhâǂhâsa ǁuib hîan ūhâb ase !gawaǀî tsî sîsenūsa. 

“Nē !āba !ûi!gâ tama is ge sadu ǀhûhâsib !hanab !aruǀî hâ tides kōse nî ī. 

ǁGam-i ge a ûi tsî sats nē !hanab projeksa nî omkhâits !aromas tsîna a ǂhâǂhâsa,” tib ge domdore-aona gere ǀawemā. 

Projeks di ǁgūbas ge, îs ga ǀorodomma 200 omaridi hîa 60%gu âde tareǁgûdi xa mâbahe nē ǀhûhâsigu !nâde, aitsama nē !hanaba xu ra ǂgâxa-ū hōǂgādi ǀkha a ǁāǁāsa.