OSHAKATI – Opombela yoMalaria mOshakati oya tameke momasiku 02 ga Sepetemba notayi ka hula momasiku 15 yaNovomba nuumvo.
Okupombela otaku ka ningwa momalukanda omu-11 gomOshakati.
Omukuluntu melelo lyondoolopa yaShakati Timoteus Namwandi okwa kumagidha oshigwana shi longele kumwe naanambelewa mboka taya ka thika pomagumbo gawo.
Ta ti, otaya ka kala ye na omandhindiliko ngoka taga ulike kutya oya za kelelo lyondoolopa yaShakati shili.
“Okupombelwa okwa simana okukeelela omukithi gwoMalaria ngoka hagu ziilile unene moomwe nohagu faalele wo oomwenyo dhaantu.,” ta ti ngaaka.
Ta ti, okukeelela omaupyakadhi ngoka ga holoke ongele oshigwana tashi ka pitika aanambelewa mboka ya pombele omagumbo gawo.
Namwandi okwa ti okupombelwa ohaku ningwa omumvo kehe pethimbo ndika lyahugunina lyokomumvo, oshoka olyo ethimbo omvula hayi tameke okuloka, mpoka oomwe hadhi kala odhindji.
Ta ti, nonando omagumbo agehe ga kala haga pombelwa omimvo dha yi, shoka osha lunduluka omolwomatompelo ge li po.
“Otandi indile oshigwana shi longele kumwe naanambelewa mboka,” ta kumagidha.
Namwandi okwa ti, omiti ndhoka hadhi pombelwa inadhi nika oshiponga, nohandhi kala mo ashike ominute 20-25, omanga megumbo inamu yiwa.
Ngoka ta ka kala e na omalimbililo kombinga yaanambelwa mboka, na dhengele koombelewa dhelelo lyondoolopa yaShakati.