ONGWEDIVA – Omunageshefa gwokonooli Veiko Haimbodi okwa ti oshigwana osha kanitha ependafule nomunangeshefa ngoka a li e na oshigwana komutima.
Haimbodi ndhika okwe dhi popi moonkundathata naKundana, mokudhimbulukwa omunangeshefa omunene Heskel Nanyeni, mwene gwoositola dhoSpotman.
Nanyeni ngoka a kala a tseyika nedhina “Spotman” molwedhina lyoongeshefa dhe, okwa hulitha Etitano, konima yuuwehame wethimbo efupi.
Okwa li e na omimvo 56.
“Nanyeni otandi mu hokolola ongomumati gomwenyo omuwanawa, ependafule nomunangeshefa ngoka a kwathele oshigwana okugandja iilonga oshowo okukandula po ondjala moshilongo,” Hambodi ta ti ngaaka.
Ta gwedha po ta ti, Nanyeni okwa li omukondjelimanguluko, noongeshefa dhe okwe dhi tameke sho a zi kombanda.
“Nanyeni okwa thigi a longa iilonga yoshilumentu unene kombinga yuunangeshefa, onkene ota kala
nokudhimbulukilwa iilonga ye.
Nanyeni okwa li woMayola gwondoolopa yOmuthiya monakuziwa ndjoka ngaashingeyi tayi ende tayi humu komeho tayi endelele,” Haimbodi ta ti.
Omumwayinakadhona Fenni Nanyeni ngoka a koleke eso lyamumwayina, okwa ti,Nanyeni okwa li omunangeshefa a tseyika nawa nedhina Spotman.
“Mumwameme okwa thigi po omwaka. Okwa li ongudhi yezimo, twa thigwa owala,’’ ta po pi ngaaka. Ta ti, mumwayina okwa li omulumentu gwombili, gwelandulathano oshowo omutulikumwe gwaantu.
Nanyeni okwa thigi ko omukulukadhi gwe noyana ye li 19.