ENDOLA – Omupresidente Nangolo Mbumba okwa ti ngele ongundu Swapo oya hogolololwa otayi ka kandula po omaupyakadhi omanene ga taalela aanyasha, tayi kala nokugandja oomilliona N$500 omumvo kehe koshikondo shaanyasha.
Mbumba okwa popi ngaaka esiku lyoshigongi oshinene shoSwapo shoka sha li kEndola mOlyomokaya.
Ta ti, Swapo ota ka kutha po wo oompango nomilandu tadhi thimininike aanyasha, nelalakano lyokuhwepopaleka onkalo yawo.
“Egandjo lyiilonga kaanyasha osho shimwe shi li momusholondondo gwiinakugwanithwa ongundu Swapo e na okuninga, ihe itatu popi ashike omolwomahogololo ngoka ge li ko momasiku 27 gaNovomba ihe oshi na okuningwa.
Omwaalu gwaantu nguka otagu ulike iizemo iiwanawa, ngele owa tala mootenda moka omu udha unene aanyasha, otashi pandulwa,” ta popi ngaaka.
Ta ti, Swapo ngele okwa hogololwa ota ka eta omalunduluko ogendji moshigwana.
Mbumba okwa dhenge wo omuthindo pelongo, ta ti otaya ka gandja ashihe tashi pumbiwa okukwashilipaleka kutya elongo otali humu komeho.
Ta gwedha po ta ti kohi yelelo lyoSwapo, iilonga itayi kala uupyakadhi otapu totwa omilandu dhokwaapula oshindji, aalongwa ya mana eyilongo lyawo kiiputudhilo yopombanda.
“Uushitwe woshilongo shetu ou na okutyapulwa kAanamibia.
Uushitwe otau ka gandja iilonga moshigwana,” ta kwashilipaleke ngaaka.
Mbumba okwa popi wo kutya Swapo okwa longo nuudhiginini okulundulula oonkalo dhAanamibia oyendji oshowo okukandula po omaupyakadhi ga kala ge ya taalela.
Ta ti, uuna oshigwana tashi ka hogolola nashi hogolole sha tala nawa, shi hogolole omuulikwapresidente Netumbo Nandi-Ndaitwah.
“Okutala omiti niihauto yi na omapandela agehe ngoka, efano tali ulike nale kutya Swapo okwa thikama peni,’’ ta popi ngaaka.
Omuhikingalo a tseyika nawa Lazarus Gazza Shiimi okwa kumagidha aanyasha ya ninge elunduluko ndyoka ya hala okumona.
“Kala oshiholelwa shoka wa hala okumona, lundululeni mu kale shoka mwa hala kehe gumwe a kale, ohashi tamekele kungoye mwene,’’ ta kumagidha ngaaka.
Shiimi okwa kumagidha wo oshigwana shi ka hogolole omuulikwapresidente Netumbo Nandi-Ndaitwah momasiku 27 gaNovomba.
Omunyasha Petrus Nalipite ngoka a li poshigongi mpoka okwa kumagidha aanyasha aakwawo kutya naya ka hogolole mondjila ihe inaya landula oondjla dha puka, ya ka hogolola oongundu ndhoka tandi pukitha aantu.