Charles Ndeumane
ONIIPA – Ombelelwa yoshikandjohogololo shaNiipa kohi yelelo lyakansela Vilho Nuunyango otayi longo nondjungu mokukwathela oshigwana shaNiipa. Oya yambidhidha aanuulema, mboka kaaye na omalukalwa, notayi tsikile nokuyambidhidha aanasikola.
Kansela Nuunyango okwa ti ombelewa ye oyi ikuthile oshinakugwanithwa shokukonga mo aantu mboka ya pumbwa omayambidhidho unene moshikandjohogololo shaNiipa opo yi ya kongele omayambidhidho ngoka ya pumbwa.
Nuunyango okwa ti ombelewa yoshikandjohogololo shaNiipa oyi li mekwathano nomalelo gopamuthigululwakalo gahamano moshikandjohogololo, oongeleka, oosikola osho wo iipangelo opo ya longele kumwe mokutotha mo aantu mboka ya pumwa omakwatho ga yooloka opo ya yambidhidhwe.
Kehe omumvo ombelewa ndjoka ohayi longitha oshimaliwa N$6000 okulandela uunona wuukadhona mboka wu li moosikola uututa. Ombelewa oya yambidhidha aantu ye na uulema ye li yane nuutemba opo ya vule okwiinyenga kuyo yene. Aantu yatatu mboka ya li kaaye na omalukalwa oya tungilwa omagumbo giipeleki.
“Itatu vulu okutala aantu yetu taya mono iihuna omanga tu li mombelewa yoshigwana. Ohatu kambadhala okukonga omakwatho mpoka taga monika opo tu yambidhidhe aantu moshikandjohogololo shetu shaNiipa. Nuumvo otwa futile aanasikola ye li omugoyi oshimaliwa shokwiinyolitha kiiputudhilo yopombanda mboka ya li itaaya vulu okwiifutila, otwa gandja oonzi dhi li ntano koongeleka dha-ELCIN ndhoka dhi li moshikandjohogololo shetu,” Nuunyango ta ti.
Moonkambadhala dhokukondjitha oshikukuta nondjala ndjoka ya dhenga Namibia nuumvo ombelewa yoshikandjohogololo shaNiipa otayi longele kumwe noshipangelo shaNandjokwe opo ya to the mo aantu mboka ye na omanyutu nenge mboka ye li kepango ashike otaya nyengwa okumona iipalutha opo ombelewa yi yape omakwatho.
Nuunyango okwa ti ombelewa ye ohayi ndhidhilike omakwatho ngoka ga pumbiwa kaantu moshikandjohogololo ndele tayi kongo omayambidhidho kaanangeshefa osho wo kepangelo opo yi fale omakwatho ngoka kaantu.
“Onda hala okupandula aanangeshefa yomoshikandjohogololo shetu mboka haya kwatha ombelewa yetu ngele twey a pumbwa ngaashi Rani Group, Kings Service, JSN, nayakwawo oyendji,” osho Nuunyango a popi ngaaka.