ONGWEDIVA – Ngaashi naana kwa didilikwa kutya oshiwana osha taalela ookalyamupombo vomaludi nomaludi, opolifi otai kumaida oshiwana opo shi kotokele okatoo okupitila keengodi davo.
Omupopiliko wopolifi koshitukulwa shaKavango West Chief Inspector Raimbert Muronga okwa ti ombelewa yaye oya didilika oshiwana sha ninga oihakanwa yokutulwa mokatoo.
“Ovanhu ohava dengelwa eengodi kutya ova findana oshimaliwa kehangano lo-MTC ashike mboli oipupulu,” ta ti.
Okwa weda po ta ti okwa didilikwa oumbudi wokuteya omaumbo hau kala wa londa pombada, naunene ohashi holoka pefimbo loivilo ilo omatango manene. “Ovanhu vamwe ohava kengelelwa va lande oimuna ya vakwa,” ta ti. Muronga okwa ti unene tuu pefimbo eli lovanhu tava shunifilwa oshimaliwa shoifendela yokongulu yepangelo nava kotokela okutulwa mokatoo.
Oshivike sha dja ko opolifi moshitukulwa shaShana oya lopota kombinga yomukainhu weedula 59 a kengelelwa oshimaliwa sheeN$29 000 konima eshi a dengelwa ongodi kutya okwa findana oshimaliwa okudilila ko-MTC.
Nakukengelela ina kwatwa po fiyo onena ashike omakonakono opolifi otaa twikile.
Omupopiliko wehangano lo-MTC Erasmus Nekundi okwa kumaida oshiwana opo shi xulife po okuyandja eenomola davo doiholekwa dombaanga.
“MTC iha dengele ovanhu ta pula eenomola davo dombaanga,” Nekundi ta ti. Muronga okwa ti ovanhu vamwe ohava kengelelwa opo va ka tolokele ookalyamupumbo ashike mboli omunhu oha kala e na elalakano loumbudi.
“Oshiwana kotokeni ngeenge tamu lande oinima komalungula shaashi oinima imwe ohai kala ya vakwa,” ta ti.