ONDANGWA – Tuutileni Mika weedula 49 okwa anyenwa omhito yokulifutila modolongo konima eshi a holoka momhangu yaNdangwa onghela.

Oshibofa shaye osha udulilwa komafiku 10 Maalisa 2025 opo ku ningwe omakonakono omoule.

Ota pangulilwa oibofa itano ngaashi oshibofa shedipao, onghendabala yedipawo, okuumba ondjebo mokati kovanhu, oshibofa shoumbudi nosho yo okuningila omatilifo edipao ovanghona vaye.

Omulumenhu ou okwa kwatwa po Etitano efimbo lomutenya shaashi vati a dipaa omunghona waye nondjebo omanga omunghona umwe okwa monifwa oshiponga keisho nokomutwe nondjebo.

Oshiningwanima osha ningilwa pehangano loHenning Crusher mOndangwa efimbo lomutenya.

Nakumonifwa oshiponga oku li moshipangelo shopaumwene shaNdangwa.

Oonakulongelwa omunyonena aveshe ovalumenhu.

Opolifi oya hokolola tai ti Mika okwa kufa ondjebo konima eshi a lombwelwa kovanghona vaye kutya ota kufwa moilonga. Pefimbo a holoka momhangu, Mika okwa pula opo a pewe obooloxa molwaashi omukulukadi waye nounona kape na ou te va yambidida.

-fhamalwa@nepc.com.na