Charles Ndeumane
Ngoloneya gwoshitopolwa shaMusati Erginus Endjala okwa kumike aanyasha ya kuthe ko uunamapya nuuniimuna neitulemo oshoka owo onakuyiwa, otawu vulu okweeta po oompito odhindji dhiilonga, wo ishewe oshinima shaanyasha nonande oyendji oye shi tala ko ongoshinima shaakokele.
Pethimbo a li moonkundathana noshikundaneki shika Endjala okwa ti ke wete kutya omolwashike aanyasha oyendji kaaye na ohokwe yokukutha ombinga muunamapya nuuniimuna nonande omu na oompito odhindji dhokwiimonena iiyemo niipalutha.
“Aagundjuka oyendji oye na eitaalo kutya uunamapya nuuniimuna oshinima shaakulupe, ashike paushili wowene uunamapya nuuniimuna owa pumbwa aanyasha oshoka oye na oonkondo dhokulonga, omadhiladhilo gawo oge li nawa natango, yo ishewe oye na oonzo dhopashinanena ndhoka ya pumbwa opo ye shi endithe nawa muunamapya nuuniimuna,”Endjala ta ti.
Endjala okwa ti kakele kokweetela po aantu pauhandimwe iiyemo, uunamapya nuuniimuna otawu vulu okuyambula po eliko lyoshilongo shi kale shi ithikamena osho wo okweeta ehumokomeho.
“Oshilongo shetu ohashi longitha iimaliwa oyindji noonkondo mokulanda iikulya kiilongo yilwe, ashike natse out na ashihe shoka shoka twa pumbwa opo tu ilongole iikulya yetu tse yene. Omuntu iho longo ashike iikulya yomwaalu ngoka wa pumbwa ashike oho longo yi vule po opo wu landithe mbyoka inoo pumbwa wu imonene iiyemo”.
Endjala okwa kumagidha aanyasha ayehe mboka ye li popepi noonzo dhomeya ngaashi moshitopolwa shaMusati moka mu na okanala haka tondoka omeya uule womvula ayihe ya ninge uukunino wawo wiimeno niikwamboga ya yooloka ndele taya imonene iikulya niiyemo peha lyokulila ondjala noluhepo omanga pe na omukalo omupu gwokweeta po sha.