Charles Ndeumane
Minista gwemona nomahangano gepangelo Iipumbu Shiimi okwa ti uuministeli owa ninga omalunduluko ogendji ngele tashi ya koofuto dhiifendela opo wu kwathele meyambulepo lyomahupilo gaantu pauhandimwe osho wo eyambulepo lyeliko lyoshilongo.
Pethimbo a li moonkundathana dhegandjo lyomauyelele nuuministeli womauyelele, omakwatathano gopaungomba, Shiimi okwa ti nonande aantu oyendji oye shi owala kombinga yiifendela mbyoka ya shuninwa aaniilonga, uuministeli owa ninga omalunduluko miifendela ya yooloka mwa kwatelwa mbyoka hayi futwa komahangano ngele taga gandja oompito dhokwiidheula kaalongwantu.
Shiimi okwa ti uuministeli owa teta pokati iifendela mbyoka hayi futwa kaagandji yiilonga ngele taya futu aaniilonga mboka taya ningi omaidheulo momahangano gawo. Uuministeli owa ningi etokolo ndika opo wu kumike aagandji yiilonga ya gandje oompito kaanyasha mboka ya mana oosikola ashike inaya mona iilonga ya mone ontseyo opo ya vule okumona iilonga.
“Otwa ndhidhilike kutya aantu otaya mana omailongo gawo kiiputudhilo yopombanda ashike itaya mono oompito dhokwiidheulila iilonga mbyoka yi ilongela.
Onkene otwa tula po omulandu kutya ngele ngoye ongomugandji gwiilonga owa gandja ompito komuntu a ninge omaidheulo miilonga yoye, owu na okufuta iifendela ashike oto futu ashike oopelesenda 50 dhiifendela mbyoka, oopelesenda 50 oonkwawo otse tatu dhi futu,” Shiimi ta ti.
Shiimi okwa ti iifendela oyo hayi etele epangelo iimaliwa yokulonga iilonga ya yooloka nokweeta po ooproyeka dhehumokomeho nomayakulo goshigwana nota indile aafuti yiifendela ya tsikile nokufuta iifendela yawo.
“Otatu pandula oshigwana shaNamibia, unene tuu mboka haya futu iifendela oshoka iifendela ohayi kwathele epangelo mokulonga iinima ya yooloka ngaashi tu li mpaka nena tatu etele oshigwama oonkundana, okulonga oopate, iinima ayihe mbyoka otayi vulu ashike okuningwa oshoka epangelo olyi na iimaliwa, shaashi aaniilonga otaya futu iifendela yawo,” osho Shiimi a popi ngaaka.