Charles Ndeumane
Omukuluntuwiliki gwehangano lyomahooli lyopashigwana lyaNamibia lyoNAMCOR Ebson Uanguta okwa ti oshikondo shomahooli moshilongo otashi ka yambula po oonkalamwenyo nokulundulula onkalo yopamahupilo yAanamibia uuna omahooli ga tameke okumboolwa.
Uanguta okwa popi ndhoka mEtiyali pethimbo a li moonkundathana dhomauyelele nuuministeli womauyelele, omakwatathano nuungomba.
Uanguta okwa ti ngiika muule woomvu ntano sigo 10 Aanamibia otaya tameke okumona omauwana ngoka taga zi miiyemo yomahooli. Anuwa mongashingeyi opu na ashike othithiya yimwe yomahooli ndjoka yi li moshitopolwa shaKavango East oyo ya tameka okumboolwa.
Oothithiya dhomahooli ndhoka dha monika momeya gaNamibia ngaashi mefuta lyaWalvis Bay, momulonga gwaOrange, oshowo moshitopolwa shaKunene anuwa natango odhi li ponkatu yopetameko lela inadhi tameka natango okumboolwa. Kokutya anuwa opu na ompito onene Namibia a kale e na omahooli momeya osho wo komutunda.
“Ngele tashi ya komahooli, otwa mona nkene omahooli haga vulu okulundulula eliko nankene omahooli haga vulu okuyambula po iilongo.
Oshiholelwa oshiwanawa ongaashi tu shi wete miilongo yopokati-uuzilo nkene iilongo ngaashi Saudi Arabia yi iyambula po lela, iilongo mbyoka oya li y ambugala ashike molwomahooli ngoka yi na oya tanauna omaliko gayo,”Uanguta ta ti.
Shi ikolelela kuUanguta eliko lyomahooli otali vulu okutungulula Namibia nokweeta ehumokomeho.
“Ngele owa tala oshilongo United Arab Emirates moka mwa kwatelwa Dubai naAbu Dhabi, oshilongo shoka ngashingeyi oshi li pondondo ya yooloka. Onkalo yopamahupilo yaantu miilongo mbyoka oya lunduluka thiluthilu okufaathanitha noomvula 20 dha za ko oshoka otaya longitha nawa iimaliwa mbyoka tayi zi momahooli opo yi yambule po nokuhumitha aantu yayo komeho.
Otu na einekelo kutya niimaliwa yomahooli mbyoka tayi ya moNamibia oonkalamwenyo dhAanamibia otadhi ka lunduluka nonkalo yawo yopamahupilo otayi ka yambulwa po,” Uanguta ta ti.
Moonkundathana Uanguta okwa popi kutya NAMCOR ina nyanyukilwa oopelesenda 10 ndhoka e na kehe mothithiya yomahooli.
“Inatu nyanyukilwa oopelesenda 10 ashike emboolo lyomahooli oshinima shi na ondilo noonkondo.
Otashi kotha oshimaliwa shoobiliona N$1.8 okumboola omboola yimwe ayike yomahooli po kapu na ekwashilipaleko lyasha kutya oto adha mo omahooli, ethimbo limwe oto vulu okumboola ndele e to kala inoo adha mo sha.
Ngawo owa fa ashike wa kutha oshimaliwa shoobiliyona N$1.8 e to umbile momeya.
Etompelo ndyono olyo twa pumbwa omahangano omanene geye ge tu yambidhidhe memboolo lyomahooli oshoka oge na oonzo dhopashimaliwa osho wo ontseyo ndjoka ya pumbiwa,” osho Uanguta a gwedha ko ngaaka.