!Goaxa a MTC ǀAeǁgams ǀō-aisa ǂomsa saran di ǁgauǂuis wekheb ge !nae!khais ase nî ī tsēs Damara Horokhoes disa !khōǂgā hâ, mûmûsa sī!nâsa !hao!nāsi aib ai nē ǁâudība nî māse. 

ǁGauǂuis hîa “Mâǂoahâ ǁgauǁgaun Damara Horokhoes din” ti a ǂgaiǂamsas ge nē ǁaxasib di ǂnāǁnâs tsēs, 6 ǂNūǁnâiseb 2024 dis ai, ǀAeǁgams !Ā!khōmais Konferensis Sali !nâ nî hâ. 

Damara Horokhoes di ǁgauǂuis ge ǁnāti ī !gôasiba !hao!nāsi sara-anab tsî !hao!nāsi ǂâibasens ǁîn tanihâs tsîna mās tsî nēs xōǀkhā ǂhâbasa !khaiba !hao!nāsi ǁnaetigu Namibiab !khūhâ ǀumis diga mâǂoahâ ǂomsa saran wekheb !nâ-ū. 

Wendy !Naruses, Projeks !Khōdana-aos ǂNīsadi Horokhoes MF wekheb dis, gere mîsa !oab ge nē !gôasib tsî aiǂhanuba !gamse Damaradi xa ra !gôa!gâhe tsî a !âu ǁoa nē -ǁaxasib !nâ ǁhaosa. 

Damara Horokhoes ge !khūhâ !nae!khaidi tsî ǂnuwiǁkhāsib tsîna tanihâ tsî !ēsa ra mā ǁîn !hao!nāsiba ǂauna !gôab mû-aon ǀkha ǀgoragusa. “Sida ge koro !kharaga!nâgu dana !âgu !nâ nî ǁgauǂuisen, ǁawoǁawo rase ǂhunuma ǂanaisaodi horokhoes didi ai ǂâisa ra ǂnûise, xawe i ge nē-e ǁnātsēs !aroma a sâusa,” tis ge ge mî. 

!Naruses gere ǀgonǀgon!gaos ge, Damara Horokhoes di ǁgauǂuidi nē ǀgui !âb ǀguib ai hâ tama hâsa, xawe ǂomaon tsî !omn ǀkha hōǂgāde ra ǁawoǁ-awobasen khoen tsîna !ēsa ra ǂnuwibasa ǁîn ǁkhāsigu tsî māde ǁgauǂuis disa, xawe nē horokhoes di !hao!nāsi ǂâibasensa ra !gôasiba māse. Ai!âs ge mîs ge, 

Damara horokhoes mâǁawos, -ǂnuwiǁkhāsib tsî !hao!nāsi ǂnīsasiba ra ǁgausa. “Nē horokhoes ge lapis ǀguisa hî tama hâ, xawe !hūǁares !kharaga xūn sida aboxan ǀumis dina ra ǂnûǁkhaeba. 

Nē horokhoes di ǁkhawa ûi-ûis/ǂherexa kais ge a ǂhâǂhâsa Damara khoeda sida !khaiba ra ū-oa tsî xawe hoan xa a ǂhâsas ge nēs ra ǀgui!nâxasib saos ase īsa,” tis ge gere !gara!ā. “Nē ǁaxasib ge ǁnaetisa sarab ǁgauǂuis ǀguisa ī tama hâ.

Nēs ge !gâi!gâisens tsî sida ǀhûhâsib tsî !hao!nāsi ǁnaetigu di ǀomkhâisa !gôa!gâsa. 

!Auga!hūsi tsî !hū!nāsi mû-aon tsî ǁhao-aon !aromab ge nē ǁaxasiba !ēs !hao!nāsi ǁnaetiga ǀgoragus, ǂâidi tsî ǂande ǀgoragus tsî !gamsib ǁkhoab tsî turaba ǁaegu ǀkha ra !gûǁare saran îxasib tsî !hao!nāsi ǁnaetiga taniǀgaras !nâ ra mā. 

Luis Munanab, MTC ǀAeǁgams ǂOmsa saran di ǁGauǂuis Wekheb di direkteri ge ǂhâǂhâsasib !hao!nāsiba nē ǁgauǂuis !nâ ǂnûǁkhaebas diba gere ǀgonǀgon!gao. 

“Sada !hao!nāsise a tari !khais ge mâǂoahâ !âsa sada ǀhûhâsib !nâ ra ǀhuru. 

Sara anab ge ǀgarupede  ra ǁgam tsî da ge Damara Horokhoesa ǁgauǂuis !nâ-ū nē ǀgarubede !hūbaib ǀkha ra ǀgoragu ǂgao. 

!Hao!nāsi anaǀgaub ge sada aboxan ǀkha ra !hûǁareda tsî nau ǀkhāb ai ǂomaon !nâ ǂhunuma ǂâiǂuisa îxasiba ra ûi-ûi,” tib ge ge mî. MTCs ge 2016ǁî kurib !nâs ge MTC ǀAeǁgams ǂOmsa saran di ǁGauǂuis Wekheb ǀkha ǂguro !nās ai a tsoatsoasa xu mâǂoahâ !hū!nāsise tsî !auga!hūsise ǀō-aisase ǀnōǁnâsa tsî ǂomsa sarana ra ǁgauǂui. 

Nē kurib di ǁaxasib ge Namibiab saran ǂharugub ai!gûsa !gâi!gâba ǀama kai tsî xawe !hao!nāsiba ra !gôa!gâ.