OSHAKATI- Omukulupe weedula 65 okwa kwatwa po konima eshi vati a hangika a humbata omandini omahooli motuwa yaye.
Otaku hokololwa kutya omukulupe ou okwa dopa okuyandja ouyelele kutya openi a hanga omahooli.
Oshiningwanima osha ningwa mexuliloshivike kolukunda Onawa mOshakati efimbo loufiku.
Okwa hangika nomandini ane eelita 25 noshoyo oundini vavali veelita nanho.
Omukulunhu koshikondo shokukonakona oimbuluma Fredrick Ndjadila okwa hokolola ta ti omufekelwa ou okwa kwatwa konima eshi opolifi kwa li tai ningi omapekapeko okukandeka oimbuluma.
Okwa kumaida oshiwana opo shi longele kumwe nopolifi okulopata ovanhu tava landifa omahooli vehe na omikanda.
Okwa didilikwa ovanhu paife hava ka tala omahooli kOshikango ndele tava ka landifa osho shi li ina shi pitikwa.
Oshiningwanima shikwao, omulumenhu weedula 33 okwa kwatwa po shaashi vati a vaka ongobe.
Oshiningwanima osha ningwa Osoondaxa komukunda Ondjungulume moshitukulwa shaShana efimbo loufiku.
Ota ku hokololwa kutya omulumenhu ou okwa shinga po ongobe koshuunda ndele tei twala komukunda wavo.
Opolifi oya hokolola tai omufekelwa okwa dipaa ongobe oyo ndele ta ka landifa okapana.
Okwa hangika e na oshimaliwa osho sha dja mokulandifa ombelela yongobe ya vakwa.