Charles Ndeumane
ONDANGWA – Ngoka a li nale kakukutu ketanga lyagameno lyaNamibia Martin Shalli okwa ti onakuyiwa yAanamibia oyi li megameno oshoka oyi li momake gongundu ta yi pangele.
Pethimbo a li ta popitha poshigongi shoSwapo shoka sha li mOndangwa Urban mOlyomakaya, Shalli okwa ti Swapo okwa ulika elelo lyopamuthika gwopombanda moomvula adhihe ndhoka a kala koshipundi moku yakula Aanamibia ayehe shithike pamwe kaashi na kutya oye li kongundu yini yopapolitika nota ka tsikila noku shi ninga..Onkene Shalli okwa indile Aanamibia opo ya hogolole ongundu yoSwapo oshowo omuulikwa president gwayo Netumbo Nandi-Ndaitwah.
Shalli okwa tumbaleke Swapo molwa eitulemo lye moku hinga ehumokomeho oshowo oku yambulapo onkalo yopamahupilo yAanamibia. Okwa ti kapu na omalimbililo kutya Swapo ota ka za mo omusindani momahogololo gopaupresidente ngoka ta ga ka kala ko momasiku 27 gomwedhi nguka, ta pataneke ompito yelunduluko mopolitika yaNamibia ngaashi sha ningwa miishiindalongo yaNamibia Botswana naSouth Africa.
“Ina ndi shi dhiladhila nande onale momadhiladhilo gandje gomuule kutya esiku limwe onandi ka thikama mpaka oomvula odhindji komeho mondoolopa yaNdangwa ya humithwa komeho, unene tuu kuSwapo,” Shalli ta ti.
Okwa tsikile ta ti Swapo okuna aayambidhidhi oyendji noonkondo onkene okuna ashike oku sindana momahogololo nande opuna mboka itaaye mu hogolola momahogololo.
“Kapuna oonkondo kombanda yevi ta dhi vulu oku ngambeka Swapo kaasindane po omahogololo ngaka ta ge ya.
Tse ka tu shi Botswana nenge South Africa ngaashi yamwe ta ya ti natu ilongele kuyo, oyo ya ndopa oku ilongela koSwapo sho osho ya kanithile iipundi moopaliamende dhawo,”osho Shalli a popi ngaaka.