Auleria Wakudumo
Omukulupe weedula 63 ota fekelwa edipao lomulumenhu weedula 35 eshi vati e mu twa nombele monhulo. Oshiningwanima osha ningwa Olomakaya, sha ningilwa koGibeon lwopo 18h20. Omupopiliko wopolifi, Deputy Commissioner Kauna Shikwambi okwa koleka oshiningwanima eshi.
Shikwambi okwa holola ta ti Vendelinus Vries okwa xulifa mokufika pokakilinika kaGibeon sha landula eshi a tuwa nombele komukulupe.
Omukulupe vati okwa li a handukila Vries shaashi a popya kombinga yomakwatafano opaihole pokati kaye [omukulupe], novakainhu vavali. Vati okwe mu ponokela, te mu denge vati nokumufanga fiyo ta wile poshi. Eshi Vries a penduka po, omukulupe okwe mu twa nombele.
Shikwambi okwa ti Vries okwa twalwa koshipangelo, ashike okwa xulifa mokufika mokakilinika. Ovakwapata vaye ova shiivifilwa onghundana ei, nomukulupe okwa holoka momhangu onghela. Oshiningwanima shikwao, okamati keedula 19, Johannes Eiseb oka xulifa omanga kakwao nako keedula 19 taka mono epango moshipangelo eshi ve liteta nokulitwa neembele. Oshiningwanima osha ningwa Etitano, lwopo 20h55, sha ningilwa kolukanda oDrimiopsis moGobabis.
Oshiningwanima eshi nasho osha kolekwa komupopiliko wopolifi, Deputy Commissioner Kauna Shikwambi. Shikwambi okwa ti oumati ava ova li ve na eenhamanhana efiku la landula oshiningwanima.
Efiku la landula, nakufya vati okwa teta omufekelwa nekatana momupolo nomufekelwa te mu tu nombele. Eiseb vati okwa xulifa konima yokutuwa nombele, omanga omufekelwa ta kondjo nomwenyo moshipangelo.
Oshiningwanima shikwao, okamati keedula 19 oka xulifa molwa eshi ka tuwa nombele komulumenhu weedula 28. Oshiningwanima osha ningwa Olomakaya lwopo 23h00, sha ningilwa kolukanda Okangwena mOndangwa.
Shikwambi okwa holola ta ti Petrus Hooni okwa tuwa nombele sha etwa eshi va li tava tanguna nomufekelwa oo e li yoo omunailonga pamwe naye, tava tanguna molwomupepo.
Omufekelwa okwa kendabala vati okuya pokati kavo, ashike nakufya okwe mu tanaukila po, te mu lwifa, omufekelwa vati okwa nhipula mo okapi ndele te i twifa nakufya.