Lahja Nashuuta 

Sho omasiku gomahogololo gopaupresidente naangoka gomutumba gopashigwana taga ende taga eta ko omayulu esiku nesiku, oongundu dhopapolitika dhi li 22 odha shaina omukanda gweiuyotho koompango nomalandulathano  dhomahogololo opo ku kwashilipalekwe kutya omahogololo otaga ka kala ko pamukalo guuyuuki nogwoshili. Omukanda gwomaiyutho gomahogololo otagu lalakanene okuhumitha komeho oshili, uuyuuki nayilwe iiwanawa pethimbo omahogololo ge li metifa.

Okwa li kwa ndhindhilikwa omaipumomumwe ga nika iikwapolitika sho iikonga yokuhwahwameka omahogololo ya tameke. Moomwedhi dha zi ko, iikundaneki oya li ya kundaneke oonkalangongo dhopapolitika dha li dha holoka mOutapi, moshitopolowa shaMusati, konima sho anuwa sho oshilyo shongundu tayi pangele yoSwapo sha li sha hingi oshitukutuku shasho sha ukitha mengathithi lyaayambidhidhi yongundu yoIndependent Patriotic for Change (IPC), moka mwa li mwa lemanekwa gumwe. Ongundu yoSwapo oya li ya yembe omayihumbato ngaka.

Inaapu pita omukakena, moomwedhi dha zi ko, oshilyo shongundu yoSwapo osha li sha ningilwa omuyonena gokolutu kolukanda lwaMix moshilandopangelo, pethimbo lyoshigongi shoSwapo. Nakupogola okwe shi ningi anuwa oshoka iongundu tayi pangele ihayi gwanitha po omauvathano gayo.

Iiningwanima yimwe oya kwatela mo iilyo yoongundu tayi tamanana tayi kondjele omiti osho wo osho wo oopaala dhamuni opo ya tule ko omapandela gawo.

Omanambo ngeya, oSwapo osho wo ongundu yoLandless People’s Movement (LPM) oya li ya yi mumwe moshitopolwahogololo shaHardap moka oongundu ndhika mbali dha li dhi na iikonga yawo mehuliloshiwike limwe. Okavidio hoka ka taambathanwa komalungula oka li taka monika ka fa ke na aantu taya kutha ko omapandela goSwapo koopaala dhamuni nokugaopinga po naangoka go-LPM. LPM okwa li a ikanyuna omapopyo ngaka, ta ti oohandimwe mboka kaye shi iilyo yawo. 

Sho ya shaina omukanda gokwiiyutha komalandulathano gomahogololo, oongundu otadhi itaala kaadhi longithe oonkondo nenge okutsitsimika elongitho lyoonkondo molwomakankameno ge gopapolitika. Okwa indikwa wo elaka lya honga, osho wo ethindolokongudhi lyaamboka ye na omaiyuvo ga yooloka gopapolitika.

Omunashipundi gwokakomisi komahogololo, Electoral Commission of Namibia (ECN) Elsie Nghikembua, ta popi pethimbo lyeshaino ndika okwa li a indile oongundu dhopapolitika dhi kale ke po onkalo ombwaanawa moka omahogololo gen a okuningwa pwaa na omambandameko gasha.

“Okakomisi oka dhimbulula kutya ope na iiningilawina yokugandja omauyelele ga puka opo ku kakekwe edhina lyetu opo tut alike ko onga kaatu shi okwiinekelwa. Shika oshinima oshiwinayi ngele otashi ya kuudemokoli wetuy. Atuheni natu imangeni uukuni kumwe tu hulitheni po etaandelo lyoonkundana dhiifundja,” ta ti ngaaka.

-lnashuuta@gmail.com