ǀAEǁGAMS – Ministeris Kai!ā tsî !Garo!ā Omkhâisens dis (MURD) ge !aromade ge mā, tare-i !aromab N$26 miljuns mâǂoahâ surudeb, ǀAnes !Ā!khōmais ǀAwemā!nans xa ge xoaǁnābahes diba. 

ǀAwemā!nans ge ǀgūǁae ge ǂanǂan, mâǂoa hâ surudeb 609 omdi tsî !hū!âdi Blok -E ǁanǁguib didi, !ā!khōmais di dīǀgaub ǂkhawusa khoena oe-ams dib di !â !khaisa. 

MURDs di sîsenǂuira direkteri, Nghidinua Danielsi ge Nampas ǀkhab ge ǂoa ge wekheb di Wunstaxtsēs ai ūhâ i dî!nâǁgam-ares !nâ ge mî, ǂhanub ge !oega nē ministeris hîa ge ǁnā ǁ-aeb ai Ministeris !Ā!nāsi ǂGaeǂguis tsî Ommās dis ase ǂansa is !nâ-ū, Ommās di !nubusiba gowaǀîs ase proxramma ge ǂgâxa-ū, !gōsase !ā!nāsi ǂgaeguidi xa nî sîsenūhese. 

“Nē proxrammi ge omkhuwi-aon hîa 13 ǂKhoesaob 1991ǁî kurib disa xu ge ǀoro !ā!khōmais omde hû kurin tamas ka i o !nāsase hâ!nâ hân, tsî nēsi hâ ǁama-aon omde ge 13 ǂKhoesaob 1991ǁî kurib dis ai!â a ǁ-ama tsî !ā!khōmâisa noxopa surude hân !aroma ǁamas maride nî ūǁnâsa,” tib ge gere ǁgui!ā. 

Kabinets ge nēs ǂnamipe a ū mîǁguib ge !gôas 16* /17.09.24/011 xa ǁgauǁgaus ase hâbahe. 

Nēs ge omdi nî ǀOro kaptein Hans Diergaardt Raads ǀAnes disa xu ǀasa ǀhonkhoesis ǁga dawa!khunihese. 

Kabinets ge nēsa !khō!gâ tsî Blok-esa ǂnuwiǀuidi ǀkha omsa omde ge ǀkhae. 

ǁKhātis ge Kabinetsa, Ministeri Kai!ā tsî !Garo!ā Omkhâisens dib tsî Ministeri Mariǁhōn tsî ǂHanub ǂNûiǂgādi dikha ge daoǁgau, îkha nē omdi hîa ommās di proxramma ǀgaiǀgais !nâ a !âdi di mâǂoahâ surudega xoaǁnâ. 

“!Ā!nāsi ǂgaeǂguidi ǀkhāba xus ge ministerisa ǁaekorobe !kharaga ministeridi, berodi tsî ǂnûiǂgādi hîa mâoahâ surudega !ā!nāsi ǀawemā!nandi ǀkha ūhâde ra ǂgan, surudega mātaresa î di !ā!nāsi ǂgaeǂguidi tsîna -ǁaeb ai NamPowers tsî NamWaters hâra mātare ǁkhā,” tib ge ge mî. 

ǀGū-ǁaeb ge ǂhanuba N$250 miljunsa  2024/25ǁî marikurib !aroma !ā!nāsi ǂgaeǂguide ge ǂnûiǂuiba, ǁama tsî sîsenūs !nangaib tsî -ǁgam-i meterdi !aroma. 

ǀAnes ǀAwemā!nans ge NamWatersa N$14 miljunsa surude tsî NamPowersa N$190 miljunsa surude hâ.

 –Nampa