Opolisi moshitopolwa shaMusati otayi kumagidha oshigwana shi hulithe po okulanda iimuna osho wo onyama ontalala momapandaanda kapu na oombapila.
Omugandji gwomauyelele gwopolisi moshitopolwa shaMusati Anna kunga okwa ti, opolisi oya kumagidha ngaaka konima ya mono uulunga wiimuna wu uka pombanda moshitopolwa.“Oshiningwanima oshitalala, omukiintu gwomimvo dhopokati okwa mangwa po Omaandaaha sho a adhika nonyama ontalala ya yakwa, a li e yi lalakanena okapana a landithe,” ta hokolola ngaaka.
Kunga okwa ti aafuthi yiimuna unene ohaya ka landitha kaalandithi yuupana, ihe uuna ya adhika nonyama ya yakwa nayo otaya mangwa po oshoka oya londodhwa nale yaa lande oonyama nenge iimuna momapandaanda. Ta gwedha po kutya kehe siku otaya lopotelwa uulunga wiimuna, omwaalu otagu indjipala kehe siku.“Otatu indile oshigwana shi kale tashi sile oshimpwiyu iimuna yawo, nayi kale miikaha yomuntu omwiinekelwa yo nayi kale tayi edhililwa. Mbyoka yi li mondoolopa nayi falwe kuushayi nenge kehala lya gamenwa,’’ ta kumagidha ngaaka.
Moshiningwanima shimwe, omulumentu gwomimvo 30 mehuliloshiwike okwa mangwa po sho kwa li a yaka oshikombo noku shi dhipaga. Oshiningwanima shoka osha holoka momukunda Oshitutuma.
Omulumentu ngoka anuwa okwa li i iyakele koshigunda shaantu e ta yaka ko oshikombo shoka shi na ongushu N$2 500.
Aakalimo yomonooli oya taalela uupyakadhi wiimuna yawo tayi yakwa kiigunda nenge nomomakuti.
Aakalimo yomiitopolwa ya yolooka yokoonoli otaya nyenyeta kutya iimuna yawo onkene tayi yakwa po.
Taya ti, unene ohayi yakwa po kaaniilonga mboka ya kutwa onga aasita yiimuna.
Sem Shipanga ngoka e li omukalimo moshitopolwa shaMusati okwa ti, oyendji yomuyo oya kutu Aangola ihe kaye ya shi nawa, naampoka ya za kaye shi po.
Ngele ye ya momindhingiloko dhawo e taya tseya mo nawa, ohaya ka yaka po iimuna yawo.
“Otatu kanitha iimuna noonkondo, ngele oya pitithwa yu ukithwa moAngola ihatu yi mono we, ihe ondi wete kutya uupyakadhi oongamba ndhoka dha weya pokati kaAngola naNamibia,” ta ti ngaaka.
Shipanga ta ti sho ya kala nale omimvo dha piti, oongombe nando odha ningi ethimbo dha kana, ohadhi ka monika oshoka omo dhili moshilongo, ihe nena ngele odha kana, ihadhi ka monika we, oshoka moshilongo odha hingwa mo.