!Hūb di ǁûb Nangolo Mbumbab ge ǁhûi-aona ge ǂgan, in ǂkhîba aimâi hâse !goaxa Presidentsi tsî !Haosi ǂNûs !aroma Wunstaxtsēs ai ǁhûi tsî nēs ǀkha demokrasisa ǀgaiǀgai. ǁÎb ge ǂoa ge wekheb di Donertaxtsēs ai !Hūb Oms tawab ge ǀkhaexūn hîa ǀasa texnoloxib smart screengu tsî tabletgu, Huawei Technologies Namibiab dis ge Oshigambo ǀGapi Skoli tsî Alpo Mauno Mbamba ǀGapi Skolhâkha !aroma a ǀkhaena gere !khō!oa soab ai nēsa gere ǀgonǀgon!gao. 

“Tita ge ra ǂgom, sada demokrasi ǂhanub ǁhûis diba da ǀnai da kuriga dī!goaxa khami ǂkhîb ǀkha !gôasib !nâ, ǂhau!nâse tsî !norasa ǀgaub !nâ nî dīsa,” tib ge gere ǀkhoma. !Hūb di ǁûb gere noxopa ǂgans ge, !hūǁîn ǀoadisidi !nâ khâima tsî ǁîn demoratise ǂhanub ǁhûidi diba nî dīǀoaǀoa !khaisa. 

“ǂGom!gâ ta ge ra nēpa ǀhaohâ khoeda hoatsama ǁhûidi !aroma xoamâisen hâ !khaisa tsî Wunstaxtsēs ai ǀoasa !gôagu !nâ sada ǁhûidomga nî ǀō kaisa, president tsî !haosi ǂnûs ǁanina ǁhûis !nâ,” tib ge Mbumbaba ge mî !aromas ǀhaos disab nî tsoatsoas ai!â. 

“Tita ge ra ǂgom, ǀkharisi ǁgau!nâs direktern, skolgu ǀawemā!nandi aiǂnû-aon tsî skoldanan nēpa hân nî ǁawoǁawosa nē ǀkhaeb nî ǂâuǀoasase ǁîn di !aroma sī!nâsa. 

ǁKhāti kha skolga nē ǀkhaeba Ministeris ǁGau!nâs, ǂNuwiǁkhāsib tsî !Hao!nāsi ǁNaetigu ministers tsî sîsenǂuira direkters hâra daoǁgaus !nâka ǁîra a ǀhonkhoese, Ministeris ǂAnǂandi tsî ǁNâu-tsî-!Hoaǂharugus Texnoloxib dis di mâxōǀkhās ǀkha, ǂhâpasa i apa nē ǀkhaexūna !gâise !ûi!gâhe tsî !gâi sîsenǂuiba skolǀgôan ai nî ūhâse nî sîsenūsa. 

Nēs !nâ-ū ǁkhāti nî ǁawoǁawose, sada skolǀgôana texnoloxib !harib ai ǀgapi ǂans ǀkha aiǂhomisa,” tib ge !hūb di ǁûba ge ǀaro. 

Huaweis danasîsenǂuira direkteri, Zhang Qiyani ge a mîs ge, nē ǀkhaeb hîa N$900 000 ǁkhāsiba !khōǂgā hâb di ǁgūbas dixitale ǂansa omkhâis ai hâsa. 

Huaweis, hoa !hūbaisise ǂans tsî ǁnâu-tsî-!hoaǂharugus texnoloxib di ǁgoeǂamaos ge 170 !hūgu !nâ a sîsenxa. !Nakaǂnôa ministers ǁgau!nâs dis, Faustina Caleys ge nē khaeba ministeris ǀ ge !khō!oa.