Auleria Wakudumo
Omupresidente wongudu yovakelefiti hano oBody of Christ Party Festus Thomas okwa holola etumba eshi ongudu ya pondola okumona ewi momutumba wopashiwana. Thomas okwa ti nonande hasho kwa li ongudu tai lalakanene, otava pandula Kalunga eshi va mona ewi.
Meenghundafana naKundana, Thomas okwa ti kava li ve na eenghono molwaashi momutumba wopashiwana kakwa li mu na ou ta popile ovakelefiti moNamibia.
“Ongudu yetu oya totwa ashike mo23 Desemba 2022, hano ongudu oi na ashike odula neemwedi, onghene otu na ashike okuenda okaendanamhadi fiyo hatu hange omalalakano etu,” Thomas ta ti.
Thomas okwa ti ongovakelefiti, ove na oinima ihapu ye va fininika oyo tava ka twala komutumba wopashiwana. Okwa holola oshikumungu shedu osho sha findila vahapu kongudi moshilongo.
“Ngeenge hatu udifa exumokomesho moshilongo, otwa dimbwa kutya otu na oinima imwe oyo tai imbi exumokomesho molwaashi ofye vene twa pata eendjila dexumokomesho. Otu na edu li li momake oohandimwe moshilongo nonande tali wilikwa kepangelo,” Thomas ta holola.
Thomas okwa twikila ta ti oshinima shedu osha pumbwa okutulwa pokati opo edu li ninge lovanhu aveshe moshilongo neendjidikila adishe da tulwa po tadi imbi ovakwashiwana okumona edu di kufwe po opo oudjuu wedu u kandulwe po.
“Ongovakelefiti, ohatu kala tuhe na ewi molwaashi otwa fininikwa kwaavo tave liufana ovakelefiti ashike itava longo oukelefiti. Ombiibeli oi na omwenyo natango ashike oya kondekwa nomalyenge,” Thomas ta ti.Thomas okwa holola yoo ta ti ove na okupopila ombiibeli shaashi oyo va itavela muyo. Okwa popya ovo va hala okulundulula vati eshito laKalunga.
“Ohatu twala yoo ekemo letu lomashenge komutumba wopashiwana osho yo omufinda utilyana oo tau lwilwa ashike kongudu imwe aike. Natango, ngeenge ohatu popi exumokomesho li ye kovanhu, oto kufa po keshe osho tashi imbi exumokomesho li ye komesho opo u hange elalakano loye,” Thomas ta ti.
Thomas okwa holola kutya ove na oikumungu ihapu oyo tava ka twala komutumba wopashiwana ngaashi eemina di li vati momake oindele. Thomas okwa pula ngeenge oshidjuu okukala omutumba noindele ndele tava kundafana opo Ovanamibia va kale hava mono yoo omauwa okudja keemina ponhele yoohandimwe.
“Ohandi pandula Ovanamibia ovo natango ve na eitavelo muKalunga opo tu mone oshipundi. Otashi ulike kutya ovakelefiti omo ve li meeveta doshilongo. Ohandi pandula yoo eengudu odo da mona oipundi mwa kwatelwa ongudu tai pangele nonde lineekela ohatu ka longela kumwe mokueta elunduluko moshiwana,” Thomas ta ti.