Sho National Road Safety Council (NRSC) a li a longekidha esiku “lyoWorld Day of Remembrance for Road Traffic Victims” momasiku 17 Novomba, okwa li kwa gandjwa omalongo nomakumagidho gehingonawa ethimbo ndika lyomatango omanene. Esiku ndyoka olya li lya ningilwa lwotango koTsumeb moshitopolwa shaShikoto, nokwa li lya gongaleke aawiliki yomahangano noominisiteli dha yooloka okusimaneka mboka ya kanitha oomwenyo dhawo okupitila miiponga yiihauto.
Natango esiku ndyoka olya li lya kundathana nkene aahingi ye na okuhinga nokusimaneka omandhindhiliko gomoondjila okuyanda iiponga.
Eugene Tendekule, omunashipundi omukuluntu gwo-NRSC, okwa popi kutya esiku ndyoka inali dhimbulukiwa ashike sho lyi li pokalindeli, ihe esiku lyi li po okudhimbulukwa oomwenyo dha kanithwa okupitila miiponga yiihauto.
“Eyando lyiiponga yomoondjila nali kale oshinakugwanithwa sha kehe gumwe ko naku tsikilwe okugandjwa omalongo nomakumagidho opo ku shonopale iiponga yomondjiila,” ta kumagidha ngaaka. Opolisi yaNamibia nayo oya kumagidha oshigwana shi hinge nawa pethimbo lyomatamgo omanene, ndyoka lya fuma ko.
Kakutu komatanga Joseph Shikongo okwa popi kutya osha simana noonkondo okukwashilipaleka kutya opu na egameno lyaakalimo naatalelipo pethimbo ndika lyomatango omanene unene tuu megumbo osho wo moopate. “Otwa tumina omwaalu omunene gwaapolisi moopate ngaashi yo-B1, B2 osho wo o-B3.
“Otatu kala twi iwetikile esiku kehe poomboloka okukwashilipaleka kehe shimwe kutya oshi li ngaashi shi na okukala.
Otatu ka kala wo tatu dhike po oomboloka dhosheendelela miitopolwa ngaashi hashi ningwa shito pethimbo ndika.
Shoka otashi ningwa moondoolopa adhihe moshilongo opo ku shilipalekwe kutya oveta yomoopate oyi iyuthwa kuyo opo aalongithi yoopate ya kale megameno,” ta popi ngaaka.
Komanda gwoshitopolwa shaShana Naftal Lungameni Sakaria okwa popi kutya etanga lyopolisi moshitopolwa shawo olyi li nale moopate okutala mpoka shoka shaa li mondjila nokugwanitha po oompango dhomoondjila.
Naftal okwi indile aahingi, aafaalelwa, aayendi yokoompadhi osho wo kehe ngoka ta longitha opate, ya gandje elongelokumwe kopolisi opo owala oshikonga shegameno lyomoopate shomatango omanene she ende nawa.
-vkaapanda@nepc.com.na