BUKALO – Katengo kamunzi wa Bukalo kafumani masheleñi alikana bolule babalalu (N$3.1 million) akulifa bayahi babaka tutiswa kushangula nzila ya zwelopili. Katengo ka ka lifa minzi ye 39 nihaike batu balishumi ka alimuñwi habasika lifiwa kale bakeñisa litaba za mapampili amulao. Zeo neli patuluzwi ki muinasipula wakatengo ka munzi wa Bukalo Simataa Mubonda, kasamulaho akukutisezwa mwa sipula sesi swana viki yefelile.

“Kulifa masheleñi kuzwelapili, buñata bwa batu balifilwe kale mi ba ba siezi habasika lifiwa bakeñi zeñwi zesika konda za ma pampili,” nekubulezi Mubonda. Mubonda uka bakwelwa ki Annoscah Mutumuswana. Ili bao kaufela ili bayemeli bakopano ya Swapo, mi neba konkiselizwe ki muatuli mwa khuta ya sikiliti Davy Kambinda. Mubonda nabulezi hala milelo ya katengo kamunzi kungelela cwalo ni mulelo wakufa mubu wakuyahela kwabatu babalikana 300 ba ba saipumaneli.

 Hamoho cwalo ni kuyaha siteshini sa kulongela, ni sibaka sa maikatulusezo. Katengo kamunzi neka kile kafa mubu hape kwa kampani ya Haamco Investment ili yeka yaha mandu alika 162. Kampani ya Les Trading and Enterprises ni yona nefilwe mubu wakuya muyaho walintolo mabapa ni mukwakwa walikululu la mutakafululele. Kansela wasilalanda sa Katima ya Matakanyani Warden Simushi nasusuelize balipisinisi kuyangwela zende zefiwa ki katengo kamunzi wa Bukalo ili mazwelo kuliba sibaka sa pabalelo ya lifolofolo sa Chobe ni sibuba sa Victoria Falls.

Munzi una ni siteshini fakunwiseza mafula alimotikala. Taba yeñwi yana bulezi muina sipula kitundululo ya lisebelezo za limbuzi ili yene shupa hahulu mwa munzi wa Bukalo kalilimo zene. Naize katengo kanyandile mwalilimo zeo, kono mwa kweli ya Liatamanyi unumwaha, lisebelezo za limbuzi zene bonahala kutisa kozi nikuba mwamayemomaswe, neli linduluzwi katuso ya likolo la zwelopili ya libaka zalitolopo ni matakanyani.

“Kububa kabunya kwa mezi mwa Bukalo neli pilaelo kakuli kasundwa nekukutezi fafasi, mi mwalibaka zeñwi bayahi nebasakoni kusebelisa mizuzu ya kutapela kapa liapehelo. Kaswalisano ni kampani ya NamWater kububa kwa mezi neku mbweshafazi,”nabulezi. Mubonda nabulezi hape kuli katengo nekafumani N$900 0000 yakufeleleza mandu a Build Together.

Kuekeza mubonda naize katengo katalimana ni butata bwa bayahi ba ba salifeli lisebelezo zelukela, mi kunuhiwa kuli bayahi bakolota katengo masheleñi alikana N$100 000. “Katengo kafumana masheleñi kakoleko ya litifo za lisebelezo. Kacwalo ni susueza bayahi kulifela lisebelezo,” nabulezi. Hala zeñwi naize sicaba basweli kuyaha mandu asika fumana pampili ya tumelelo, mi naize libaka kikuli katengo hakana babeleki mwa ofesi yebona zakutatuba mandu, cwalo naelelize bayahi kubona kuli babata lisebelezo zeo kolifumaneha.