OGONGO – Minista guunamapya omeya niikwameya Calle Schlettwein okwa kwata odhopi ongepatululo lyiilonga yokulongulula omunino gwomeya omukulu pokati kOgongo nOshakati Etitano. Schlettwein okwa ti, oominino dhoka dha ningi omimvo dha pita 40, odha kulupa onkene otadhi longululwa ta mu tulwa dhimwa omipe koshimaliwa shi thike poomilliona N$235.
“Ominino odha kulupa nodha kala tadhi gandja uupyakadhi wepato lyomeya sho dha kala nokutopaatopa,” ta fatulula ngaaka. Ta ti, oopaipi ndhoka oompe ngaashingeyi tadhi longwa otadhi kala ekandulepo lyomukundu gomeya moshitopolwa shaMusati oshowo Oshana. Ta popi kutya okuna otseyo kutya opena omahala gamwe ga ningi ethimbo gataalela uupyakandhi womeya, ihe otaya kwashilipaleke kutya uudhigu mboka owuli metifa okukandulwa po.
Schlettwein okwa tengeneke kutya iilonga ayihe mbyoka otayi kapwa okulongwa omumvo taguya.
“Natango iilonga yoopaipi oyili metifa koshitopolwa shaHangwena hoka nako wo kuna uupyakandhi womeya, nuuna kwapu okulongwa oopaipi ndhoka otadhi ka tsakanena pamwe nokOshikoto opo uuna ombinga yimwe yaana omeya itapu kala pena epato lyomeya.
Otaga kala taga zi kombinga yimwe,” ta fatulula ngaaka.
Omukuluntu wiliki mehangano lyoNamWater Abraham Nehemia okwa ti, iilonga yokulongulula oopaipi pokati kOgongo nOshakati oyili metifa.
Ominino ndhoka omikulu otadhi longululwa nelalakano lyokukandula po uupyakandhi womeya moshitopolwa shaMusati nOshana mboka ngaashingeyi tau nyenyetwa koshigwana.
Nehemia okwa indile wo oshigwana shi hulithe po okutunga kombanda yominino dhomeya.
“Oshigwana nashi hulithepo okutunga kombanda yominino oshoka ohashi kanitha oshindji. Ngele ominino ndhoka dha topa katuna nkene ta tu ningi po ihe okuteyagula po ashike etungo ndyoka kaapena okufutwa,” ta po pi ngaaka.
Ta kumagidha kutya oshigwana nashi kale hashi ningilwa omapekapeko gwomahala omanga inashi landa okuyanda uupyakandhi wuli ngaaka.
Ngoloneya gwoshitopolwa shaMusati Erginus Endjala oshowo ngoloneya gwoshitopolwa shaShana Elia Irimari esiku ndyoka okwali ya pandula NamWater sho a katuka onkatu yoshilumentu okukandula po uupyakandhi mboka wa kala noku etitha epato lyomeya miitopolwa moka.
-vkaapanda@nepc.com.na